Talaq -iddat

Question: Ene personne fine donne so madame ene talaq quelques jours avant so l’accouchement. Quand madame-là fini accouché, li fine redonne li deux talaq. Eski ça couple-là capave continué vive ensemble couma missié madame ?

Réponse: Quand ene madame gagne talaq, ça nécessite li observe so iddat. Iddat ene madame ki fine gagne talaq li varié selon position ça madame-là. Si li ene madame ki habitué gagne so haiz (période) et li pas enceinte, alors li bizin observe iddat pendant trois haiz. Si li ene madame ki pas encore gagne haiz ou bien ki fine arrête gagne so haiz, alors li bizin observe so iddat pendant trois mois. Pou ene madame ki enceinte, so iddat duré juska l’accouchement. Pou revine avec ou question, ça madame ki so missié fine donne li ene talaq, so iddat terminé avec l’accouchement. Quand iddat fine terminé avec l’accouchement, ça veut dire ki li fine fini sorti en dehors nikah so missié. Donc après l’accouchement perna aukene lien de nikah ki existé entre ça missié-là ek ça madame-là. Zotte fine vine absolument étranger ene à l’autre. Astere ça deux talaq ki li fine donne so madame après l’accouchement, c’est ene talaq ki fine donné à ene madame complètement étrangère ki pas dans so nikah. Ene talaq pareil pas compté et pas porté. Donc ça madame-là fine sorti en dehors nikah so missié par ene seul talaq. Acoze ça zotte ena chance capave vive ensemble couma missié madame mais zotte bizin refaire nikah. Ici na perna aukene question de halaalah posé.

[Extrait de Al Jamiat Vol.1 No.14]