Ene dimoune intelligent?

Ene dimoune ki servi ene la bougie ene ou deux roupies pou rode ene pièce cinquante sous ki li fine perdi, pas capave ene dimoune ki vraiment ena l’intelligence. Apart la monnaie, li fine perdi so le temps précieux aussi. Mais en fin de compte ki li fine gagné ? Ene cinquante sous narien du tout ki pas couvert même le frais de ceki li fine dépensé.

Quand nou tanne ça, nou pas bizin riyé. Parceki ena l’exemple ki capave faire nou gagne riyé pli bien encore. Si nou ena l’intelligence, pas riyé ki nou pou riyé ! Nou pou pleuré parceki acoze ene dounia ki pas représente narien du tout divant aakhirat, nou pé noirci nou aakhirat. Acoze ene ti bâtiment dans dounia, nou pé perdi grand grand château dans jannat. Couma dire acoze ene ti la tente narien du tout lors la plage acote nou ena pou reste ene deux jours là-bas, nou pé perdi et néglige nou la caze à cote nou ena pou reste pou tout le temps. Rasouloullah ‎(Sallallaahou A'laihi Wasallam)‎ fine dire ki dounia li couma dire ene l’ombrage en déclin continuellement.

Ene dimoune intelligent c’est ene kikene ki donne ene ti kitchose de ene ti valeur pou gagne ene kitchose de ene grand valeur. La vie dans dounia li ene la vie temporaire. Et la vie dans aakhirat même ki pou resté pou tout le temps. Ene dimoune vraiment intelligent pas pou hésité pou sacrifié ça la vie temporaire-là pou réussir dans la vie éternelle. Ene vrai musulman li bizin être ça genre intelligent-là.

[Extrait de Al Jamiat Vol.2 No.1]