Hors contexte

Allah Ta’ala fine donne chaque dimoune ene genre de beauté dans ene façon particulière. Ena dimoune so beauté physique li trouve dans so cheveux. Ena ki ena ça dans so lizié, so néné etc. Mais tous ça banne parti le corps-là bizin guette zotte dans zotte vrai place pou capave trouve zotte beauté réelle.

Ça lizié ki ti paraite joli et ki ti pé captive le cœur des milliers, capave vine ene source de terreur si guette li en dehors ça place ki li été-là. Et coumsa même tous banne parti ki paraite joli dans ene dimoune, faudré bizin guette li dans so place approprié pou trouve so beauté réelle.

Dans la même façon, beauté ki cachiette dans principes et banne la loi Islaam, bizin guette zotte dans so l’ensemble et dans zotte système complète pareil couma nou trouve la vraie beauté ene pierre précieuse quand li fixé et bien encadré dans ene bijoux - Non pli quand li isolé.

Quand nou isole banne la loi couma coupe la main, lapidé à mort et condamné à mort etc. depi dans so système complète et nou analyse li, nou pou trouve li barbare. Mais quand nou guette li dans so système et so “set up” complète, ça même li pou paraite juste, équitable et garant de sécurité, l’harmonie et liberté sociale.

Ça amene nou pou comprend ki li ene erreur capital présente ou comprend ene sujet, propos ou ene déclaration en dehors so contexte. Parceki ça faire joli vine vilain et vilain vine joli. Vertu vine vice et vive vine vertu. Nou appelle ça ene genre de détournement d’informations et malhonnête intellectuelle.

Ena encore ene façon ki boucou pé servi pou commette ça genre de malhonnête-là. Ena boucou ki pé coupé tranché pou présente ou reproduire déclarations ou propos banne grand savants en dehors zotte contexte. Zotte but derrière ça c’est crée doute et dégoût dans le cœur dimoune pou ça banne grand savants-là. C’est banne fausseurs, banne falsificateurs et banne blasphémateurs ki ena pou paye bien cher cote Allah Ta’ala si zotte pas repentir. Sinon, perna aukene utilité apart ki banne l’esprits désordeurs oulé à tout prix crée désordres.

[Extrait de Al Jamiat Vol.2 No.2]