Qourbaani

Hazrat Abou Hourairah ‎(Radiyallahou anhou‎)‎ fine rapporté ki Rassouloullah ‎(Sallallaahou A'laihi Wasallam)‎ fine dire : « Celui ki ena le moyen et li pas faire Qourbaani, alors li bizin pas approché avec nou Mouswallaa – (Eidgah). » (Ibn Majah/Mousnad Ahmad/Mouswanaf Ibn Abou Shaibah/Ad-Daarqutni/Moustadrak Al-Haakim)

Ça hadice-là li qualifié de ene hadice sahih (authentique) par Allaamah Al-Hafiz Ibn Hajar Al-Asqalaani dans so commentaire Fat-hul Baari ki li fine écrire lors Sahih Al-Boukhari. Coumsa même Al-Haakim aussi fine qualifié ça hadice-là de ene hadice sahih (authentique) dans so Al-Moustadrak.

Li bon conné ki ça hadice-là fine être rapporté dans deux façons : Ena banne rawi (narrateurs) fine rapporte li comme ene déclaration de Hazrat Abou Hourairah ‎(Radiyallahou anhou‎)‎. Et ene l’autre groupe de banne rawi fine rapporte li couma la déclaration et la parole de Rassouloullah ‎(Sallallaahou A'laihi Wasallam)‎. Mais ça différence ki fine ena de la part banne rawi dans rapporte ça hadice-là li pas ene critère ki capave affaibli la position de ça hadice-là. Parceki li possible ki Hazrat Abou Hourairah ‎(Radiyallahou anhou‎)‎ fine rapporte ça à so banne z’élèves, parfois sans réfère li à Rassouloullah ‎(Sallallaahou A'laihi Wasallam)‎ et parfois li fine réfère ça à Rassouloullah ‎(Sallallaahou A'laihi Wasallam)‎. Donc chaque z’élève et chaque groupe fine rapporte li couma li fine tendé.

D’après banne savants de hadice, dans ene situation pareil, si banne ki fine rapporte li comme la déclaration de Nabi ‎(Sallallaahou A'laihi Wasallam)‎ zotte banne rawi sérieux, alors bizin donne zotte version préférence lors version lezot. Ici banne ki fine rapporte ça hadice-là comme la parole de Nabi ‎(Sallallaahou A'laihi Wasallam)‎ zotte banne rawi (narrateurs) sérieux, alors d’après principe bizin accepté ça comme la parole de Nabi ‎(Sallallaahou A'laihi Wasallam)‎ même.

Explication :

Rassouloullah ‎(Sallallaahou A'laihi Wasallam)‎ fine adopté ene ton assez sévère à l’égard de celui ki pas faire Qourbaani malgré ki li ena le moyen. Li fine jusqu’à même empêche ene personne pareil approché avec Eidgah. Ene ton sévère pas capave adopté lors ene action ki optionnelle. Li bizin ene action ki important et obligatoire. Ça ton sévère-là fine adopté lors pas faire Qourbaani malgré ki ena le moyen pou faire li. Donc ça prouvé ki Qourbaani li waajib (obligatoire) lors ene personne ki ena le moyen.  

[Extrait de Al Jamiat Vol.2 No.2]