Rode facilité

Tous dimoune content gagne facilité dans la vie. Et li ene droit légitime de tout un chacun. D’après shariat aussi li pli bon ki ene dimoune choisir ene kitchose facile. Rassouloullah ‎(Sallallaahou A'laihi Wasallam)‎ aussi ti pé choisir ceki pli facile quand li ti ena choix entre deux kitchose ki permette.

Donc rode facilité li ene kitchose tout à fait naturel et normal. Ça veut dire ene dimoune ki ena facilité mais malgré ça li complique so la vie, li ene dimoune pas normal.

Allah Ta’ala fine ranne nou la vie facile. Li pas fine mette aukene difficulté lors nou. Astere si nou complique nou la vie, ça veut dire ki nou na pas oulé vive ene la vie normal. Par exemple capave mette ene simple linge dans mariage. Allah Ta’ala pas fine oblige nou faire banne linge cher. Au contraire Allah Ta’ala fine empêche nou faire gaspillage. Malgré ça nou acheté banne linge cher pou mariage. Acoze ça nou bizin sacrifié et prend prêté. Mette fardeau lors nou partenaire. Dans faire tout ça-là, nou néglige ene quantité kitchose ki important.  Fine bizin manque namaz - pas fine réussi faire li dans l’heure. Tout ça là, acoze ki nou fine complique nou la vie par engage nou dans banne kitchose ki inutile ou bien pas nécessaire.

Donc dans la simplicité ena facilité ki ranne nou la vie facile. C’est ene façon de vive ki Allah Ta’ala content et ki Rassouloullah ‎(Sallallaahou A'laihi Wasallam)‎ fine recommandé. Mais li important ki nou rode nou facilité sans faire kikene du tort. Ene dimoune ki guette so facilité quand même ça pé nuire lezot, li ene égoïste. Ene égoïste li pas ene bon dimoune. A la longue li aussi so la vie li ruiné parceki personne pas content ene dimoune pareille. Alors li très important ki chaque dimoune li prend en considération so prochain avant li rode so facilité.

[Extrait de Al Jamiat Vol.2 No.6]