Bijou en or

Ene zomme pas gagne droit servi l’or en forme bijou. Quant à banne madames, zotte gagne droit servi l’or en forme bijou. Ena banne hadices ki donne l’impression ki banne madames aussi pas gagne droit servi bijou en or mais d’après tous banne savants, ça hadice-là soit fine abrogé ou bien ça li applique lors banne madames ki expose zotte bijoux divant banne zommes étrangers. Couma li possible ki ça applique lors banne ki mette ça par vantardise.

De toute façon, porte bijoux en or, li ene kitchose ki tout à fait permette pou banne madames. Allaamah An-Nawawi et Allaamah Bin Hajar Al-Asqalaani, zotte tous dire ki ena Ijma (consensus) banne ‘Oulama lors le fait ki banne madames gagne droit porte banne bijoux en or.

Li bon conné ki Ijma c’est ene preuve bien bien solide parceki Rassouloullah ‎(Sallallaahou A'laihi Wasallam)‎ fine donne garanti ki tous banne ‘Oulama pas capave tombe d’accord lors ene kitchose ki pas bon. Donc quand zotte tous d’accord ki ça li permette, alors li bizin ene kitchose ki permette.

Ene fois quand banne ‘Oulama fini tombe d’accord lors ene point, alors astere personne perna droit revoir la question. L’opinion isolé-là ena li impé partout même ça. Bizin pas prend compte banne l’opinions isolées. Bizin toujours marche avec Ijma. Quant à banne objets en or couma l’assiette, cuillères, plats, peignes etc. apart banne bijoux, ça li haraam lors zomme et madames tous les deux. Ceki permette c’est seulement bijoux en or pou banne madames !

“L’or et la soie fine autorisé pou banne madames dans mo ‘Oummat et ça fine interdit pou banne zommes.” (Nissa-ï)

[Extrait de Al Jamiat Vol.2 No.7]