Zouhd

Zouhd c’est ça qualité ki faire ene dimoune pas intéressé avec banne kikchoses mondaine. Acoze ça Zaahid c’est ene personne ki so le cœur pas attaché avec Dounya. Le cœur pas attaché avec Dounya pas veut dire ki li pas mangé boire et li pas marié. Ça banne kikchoses-là pas empêche ene dimoune vine Zaahid. Parceki pli grand Zaahid c’est Rassouloullah ‎(Sallallaahou A'laihi Wasallam)‎. Et Rassouloullah ‎(Sallallaahou A'laihi Wasallam)‎ fine mange bon mangé aussi et li fine marié avec plusieurs madames. Donc li pas contraire à Zouhd. Ceki essentiel dans Zouhd ki ene dimoune pas bizin laisse l’amour Dounya rente dans so le cœur à tel point ki li alle désobéir Allah Ta’ala. Li bizin servi kikchose dans Dounya comme ene aide et ene moyen ki permette li faire ibaadat pou Allah Ta’ala sans laisse l’amour ça banne kikchoise-là domine l’amour ki li ena pour Allah Ta’ala dans so le cœur. Li couma dire ene bateau dans dilo ki bizin dilo pou flotter - sans dilo li pas capave flotter. Coumsa même ene dimoune li bizin Dounya pour li vive - sans Dounya li pas capave vive. Mais si dilo rente dans bateau, bateau-là pou couler. Coumsa même si Dounya rente dans le cœur, alors le cœur-là pou couler.

Donc Zouhd veut dire servi Dounya ene quantité ki bizin sans laisse li rente dans le cœur et sans laisse li domine l’amour ki ou bizin ena pou Allah Ta’ala.

[Extrait de Al Jamiat Vol.2 No.8]