Hazrat Haaritha bin Souraaqah ‎(Radiyallahou anhou‎)‎

Hazrat Haaritha Bin Souraaqah ‎(Radiyallahou anhou‎)‎ ti garçon Hazrat Ar-Roubayyi ‎(Radiyallahou anhou‎)‎. Hazrat Haaritha ‎(Radiyallahou anhou‎)‎ ti shaheed dans bataille de Badr. So mama ti envi conner cote so garçon été dans Aakhirat. En réponse Rassouloullah ‎(Sallallaahou A'laihi Wasallam)‎ fine faire li conné ki Hazrat Haaritha Bin Souraaqah ‎(Radiyallahou anhou‎)‎ li dans Al-Firdaus-al-A’la.

Dans jannat ena ene quantité grade. D’après hadice, Jannat-ul-Firdaus c’est grade pli supérieur dans Jannat. Donc d’après ça hadice-là Hazrat Haaritha Bin Souraaqah ‎(Radiyallahou anhou‎)‎ fine gagne grade pli supérieur dans Jannat.

D’après Qour’aan-e-Kareem et hadice Nabi ‎(Sallallaahou A'laihi Wasallam)‎, Jannat li ene l’endroit cote na perna aukene problème, aukene tracas et ni ena kit difficulté. Jannat c’est ene l’endroit cote ena le bien être total. C’est ene l’endroit cote pas seulement ou gagne ceki ou bizin mais ou pou gagne ceki ou dimandé et ceki ou envi.

Si nou souhaite vine dans position ene le roi ou ene multimilliardaire par exemple, acoze ki d’après nou, zotte ena le bien-être et acoze ki zotte capave gagne ceki zotte bizin, alors Hazrat Haaritha Bin Souraaqah ‎(Radiyallahou anhou‎)‎ li pli mérité ki nou souhaité vine dans so position.  Parceki ceki Hazrat Haaritha Bin Souraaqah ‎(Radiyallahou anhou‎)‎ fine gagné, li pou tout le temps.  Jamais li pour perdi li.  Ene bien être ki pou reste éternellement li pli mérité ki nou souhaite gagne li.  Dans Qour’aan-e-Kareem Allah Ta’ala dire :

“…Celui ki fine être protégé de du feu (l’enfer) et fine gagne admission dans Jannat, alors certainement li fine gagne le succès ...” (S3 V185).

Hazrat Haaritha Bin Souraqah ‎(Radiyallahou anhou‎)‎ fine gagne ça vrai succès-là par donne so la vie dans chemin Allah Ta’ala.  Si nou pas prêt pou ça quantité-là, au moins nou capave sacrifié nou banne désirs pou le plaisir Allah Ta’ala.  Ça aussi li ena so valeur dans liziyé Allah Ta’ala.

Et d’ailleurs jannat li ene faveur Allah Ta’ala.  Faudré pas nou hésité pou dimane Allah Ta’ala so faveur. Et quand dimandé, bizin dimane bien meme sans hesitation. Dans ene hadice, Rassouloullah ‎(Sallallaahou A'laihi Wasallam)‎ fine dire quand ou dimane Allah Ta’ala, alors dimane li Jannatul firdaus.

Nou fier de toi O Haaritha!  To fine gagne le vrai succès.  Ki Allah Ta’ala accorde nou tous, so faveur par so bonté et so grâce.  (ameen)

[Extrait de Al Jamiat Vol.2 No.8]