Ene façon pou arrête faire péché

Si ene dimoune prend l’habitude reste avec wazou, ça dans ene certaine mesure capave aide li pou reste loin avec péché. Parceki quand li pou ena wazou lors li, li pou ena la volonté et le désir pou reste dans zikrullah. Couma nou conné, zikrullah li protége ene dimoune contre shaitaan ki oulé à tout prix détruire li. Alors zikrullah pou servi comme ene protection contre shaitaan et ça pou garde li loin de banne péchés. Dans ene hadice, Rassouloullah ‎(Sallallaahou A'laihi Wasallam)‎ fine faire nou conné ki shaitaan reste assizé lors le cœur ene dimoune. Quand li faire zikr, shaitaan li avancé depi lors so le cœur et quand li arrête faire zikr, shaitaan revine pou fatigue li avec tout qualité mauvais pensée. Coumsa même quand ene dimoune ena wazou lors li, li essaye pou garde valeur ça wazou-là par pas guette kitchose ki haraam pou guetté. Li préserve so la bouche, so zoreille et tous so banne organes de banne kitchose ki pas bon. Dans ce sens, wazou li servi li comme ene bouclier et ene genre de protection contre shaitaan. D’ailleurs d’après hadice, wazou li purifié ene dimoune de so banne péchés ki li faire. Donc li ene moyen de purification aussi. Reste avec wazou, c’est ene de banne raisons ki fine accorde Hazrat Bilal ‎(Radiyallahou anhou‎)‎ l’honneur ki Rassouloullah ‎(Sallallaahou A'laihi Wasallam)‎ fine tanne so son marché dans Jannat.

[Extrait de Al Jamiat Vol.2 No.10]