Kaffaarah pou roza

Ene dimoune ki fine casse so roza par alle dans ménage bizin donne kaffaarah et remplace ça ene roza ki li fine cassé-là. Kaffaarah veut dire ki li bizin libère ene esclave. Couma zordi jour pena systeme esclavage, alors li bizin garde deux mois roza consécutif. Si li pena capacité faire li, alors li bizin donne 60 pauvres chakene valeur ene fitra.

Ça couma li applique pou ene dimoune ki fine casse so roza par alle dans ménage pendant roza, li applique aussi pou ene dimoune ki fine mangé boire avec connaissance sans aukene raison valable. Dans ene hadice ki trouve dans Darqutni rapporté par Hazrat Abou Hourairah ‎(Radiyallahou anhou‎)‎, ene personne ti mangé dans Ramadhaan, alors Rassouloullah ‎(Sallallaahou A'laihi Wasallam)‎ ti ordonne li pou donne Kaffaarah. Ça hadice-là montré ki Kaffaarah pas waajib seulement quand fine casse roza par alle dans ménage. Ça li applique pou ene ki fine casse li par mangé boire aussi.

A noté ki dans sanad ça hadice-là ena ene narrateur ki so position li controversé. Selon certain li correcte couma certain pas fine accepté li. Dans domaine hadice, ene rawi pareil li pas négligeable. Li ene rawi acceptable et so hadice li qualifié de ene hadice Hassan ki capave soutenir ene thèse. Donc ça hadice-là li ene hadice assez fort ki capave servi pou soutenir la thèse ki Kaffaarah li obligatoire quand casse roza par mangé boire aussi. Li pas applique seulement quand fine casse li par alle dans ménage seulement.

[Extrait de Al Jamiat Vol.2 No.12]