Guette ou l'avantage

Chaque dimoune ena droit guette so l'avantage. Dans ene façon de dire, capave dire ki chakene bizin guette so l'avantage. Et évidemment ceki presque tout dimoune pé faire. Mais li pas bizin faire ça à tout prix. Ena certaine kitchose bizin prend en considération avant rode ou l'avantage. Faudré ça rode l'avantage-là li pas faire kikene du tort. Par exemple ou ena l'avantage borde ou l'auto divant garage kikene mais ça li embarrassant pou ça dimune-là. Coumsa même quand nou rode nou l'avantage, nou bizin guetté eski si vraiment li dans nou l'avantage. Ene kitchose ki vraiment avantageux c'est ene kitchose ki bénéfique ici lors la terre et là-bas dans aakihrat après la mort. Ou bien ene kitchose ki paraite pas profitable ici mais définitivement li pou bénéfique dans aakhirat. Par exemple garde bonne relation et reste en bon terme avec banne dimoune et surtout banne proches et mama papa ki bénéfique dans Dounia et ki ena banne bienfaits énorme dans aakihrat cote Allah Ta'ala. Coumsa même si ou perdi ene ti pé pou gagne boucou dans aakhirat, ça aussi li ene l'avantage ki tout dimoune bizin rodé. Par exemple ou ferme ou magasin ene ti pé bonheur pou capave gagne ou namaz dans l'heure avec jamaate dans masjid. Li normal ki ou pou perdi ene ti pé la vente mais ça pou bien rapporte ou dans aakhirat. Donc ene kitchose ki pou faire ou du tort dans la vie aakhirat, li pas ene l'avantage, même si li paraite bien correcte. Li couma dire mange ene tranche zanana bien pimenté ki paraite bien bien correct mais ki capave faire ou souffert pou tout le temps.

[Extrait de Al Jamiat Vol.2 No.13]