Doux et fade

Boire ene di thé doux. Apres ça mange ene goulab jamoune, laddou ou bien jilebi et après ça reboire ou di thé. Ou pou remarqué ki dans commencement, di thé-là ti paraite bien bon mais la deuxième fois li ti paraite pas bon parceki li ti fade. Ou ti trouve li doux et bon parceki ou pas ti conné ki appelle vraiment doux et bon. Quand ou fine gagne l'occasion goute ene kitchose vraiment doux, ça fine dévalué ça di thé ki ou ti boire dans commencement. Coumsa même arrive dans nou dans la vie de tout le jour. Nou content sanla, nou content l'autre-là. Nou pas capave reste sans li. Nou capave donne ziska nou la vie aussi si fallait. Ene beau jour nou trouve ene l'autre ki ene ti pé pli joli. Astere ça avant-là fine vine fade. So banne signe de beauté commence paraite banne vilain taches lors figure. Couma dire tanque ou ti faim, ou pas fine gagne l'occasion guette narien. Au fur et à mesure ou vente pé plein, ou trouve mangé-là fort, manque di sel, pas assez chaud etc. Ou commence trouve ene tas défauts.

Coumsa même tout kitchose bon dans dounia à tel point ki nou perdi nou même derrière ça dounia-là. Mais jour ki nou pou réussi gagne vrai l'amour et l'amitié pou Allah Ta'ala, tout kitchose pou vine fade. Si nou pé content tout kitchose et nou attache nou le coeur avec tout kitchose, c'est acoze ki nou pas encore conne ça vrai l'amour et l'amitié-là. Ene vrai l'amitié c'est ça l'amitié ki ene dimoune ena pou so Rabb.

[Extrait de Al Jamiat Vol.2 No.13]