But et l'effet

Le but ki Allah Ta'ala fine crée nou; c'est l'obéissance à Allah Ta'ala. Nou obéir Allah Ta'ala nou faire li plaisir. Donc le but de nou l'existence même c'est vive dans le plaisir Allah Ta'ala. Dans vive pou le plaisir Allah Ta'ala, ena ene quantité bienfaits et banne bon l'effets. Mais faudré pas nou vive dans l'obéissance Allah Ta'ala avec l'intention pou bénéficié so banne bon l'effets. Dans faire ça nou pou perdi nou vrai direction. Et ça pou dévié nou de nou destination réelle. Par exemple ene dimoune li ena ene destination ki li pé oriente li vers ça. Pou alle ziska so destination, li bizin suive ene trajet ou ene chemin. Dans li pé alle vers so destination, li trouve banne joli joli vues. Si li reste guette ça banne joli vues-là, peut-être ça capave dévié li de so destination. Sinon au moins ça pou retarde li dans complète so trajet. Coumsa même nou vrai but et nou vrai destination c'est le plaisir Allah Ta'ala. Le moyen ki pou servi pou atteine ça, c'est le Deen. Dans suive Deen, nou trouve so banne bon l'effets. Faudré pas reste admire so banne bon l'effets. Sinon ça pou faire nou attane banne bon l'effets pou chaque bon travail ki nou faire. A ce moment-là nou pou faire bon travail pou trouve so bon l'effet. Nou pou blié ki nou but réel c'est le plaisir Allah Ta'ala.

Par exemple ene personne quand li pratique so Deen bien, li capave trouvé ki so travail pé marche bien. Li commence rêve banne joli joli rêve. Dimoune content li. Li trouve tout so banne transactions dans l'ordre. Mais faudré pas li galoupe derrière ça banne l'effets-là. Si li faire ça, li pou alle perdi chemin. Parceki couma dire li pé pratique Deen ziste pou ça banne bienfaits-là. Or, li ti bizin pratique Deen pou faire Allah Ta'ala plaisir quand même li pas trouve aukene l'effet. C'est necque pratique Deen dans ca façon-là ki ena succès.

Ça explication-là amene nou pou comprend ene principe : Quand nou faire ceki bizin, couma bizin, dans contexte ki bizin, avec l'intention ki bizin, alors après ça nou pas bizin guette ki l'effet li ena. Par contre quand nou gagne ene bon l'effet pou ene travail ki fine mal faire, ça na pas justifié ça mauvais travail-là ou bien ça bon travail ki fine fine mal faire-là.

[Extrait de Al Jamiat Vol.2 No.13]