Union ideale

Ene fois ki ene couple fine joine par Nikah, zotte joine pou la vie la mort. Sa c'est l'idéal ki les deux parties bizin faire z'effort pou réaliser. Parceki mariage li pas ene badinage ki faire pou ene ou deux jours. Sa li faire pou tout le temps. Pour capave réalise sa l'idéal-là, chakene bizin faire ene ti concession. Faudré pas chakene necque exige so droit. Toute sorte bouleversement dans le monde pé vine apartir sa même l'attitude. Dimoune fine vine égoïste. Chakene conne pou li. Chakene pé exige so droit. Personne pas osé pense so propre responsabilité envers les zotte. Donc dans ene la vie conjugale, chakene bizin d'abord assume so responsabilité. Chakene bizin conne so devoir et acquitté de so devoir envers so partenaire avant ki li exige ou réclame so droit.

Dans ce cas, peut être personne pas pou trouve la nécessité réclame so droit. Chakene pou gagne so droit sans réclamé. Mais li très important ki chakene conne so devoir et so responsabilité pou capave mieux assume so responsabilité.

Responsabilité ene missié

Ene missié bizin occupe so madame bien. Occupe bien veut dire occupe li en sorte ki garanti so bien être. Le bien être ene madame li trouve dans gagne so banne nécessités de bases - surtout couma mangé, boire, linge et ene place convenable pou li resté. Tout sa-là li bizin gagné avec dignité et dans respect. Et apart sa, ceki li pli bizin c'est l'affection et l'amitié de la part so missié.

Responsabilité ene madame

Ene madame bizin obéir so missié dans tout ceki shari'ah autorisé sans manque li du respect. Li bizin donne li so valeur couma ene missié. Selon ene hadice, si kikene ti gagne droit faire sajdah pou kikene apart Allah, alors ene madame ti pou bizin faire sajdah pou so missié.

Faudré pas ene madame sorti depi dans so la caze sans permission so missié. Li bizin toujours garde so l'honneur et so chasteté. Li bizin gère la caze so missié et so banne z'affaires avec l'honnêteté et sincérité.

[Extrait de Al Jamiat Vol.1 No.9]