Ene société idéale

Bizin ena la justice pou dimoune capave vive avec la paix. Sans la justice, chaque individu dans la société senti li menacé en ceki concerne so la vie, so di bien, so la famille et so dignité. Ene societé à cote dimoune bizin peur dimoune plis ki dimoune peur serpent scorpion etc, c'est ene société vraiment barbare malgré li paraite bien civilisé pou lizié dimoune.

Bizin ena ene seul qualité la loi pou tout dimoune. Pas capave ena ene la loi pou ti dimoune et ene l'autre la loi pou ene l'autre catégorie dimoune. Sans ça ene société pas capave être considéré couma ene société civilisé. Ene société acote la loi li applique lors seulement ti dimoune, c'est ene société injuste et barbare ki permette ene certaine catégorie de la population piétine droit ene l'autre catégorie.

Ene fois dans l'époque Rassouloullah ‎(Sallallaahou A'laihi Wasallam)‎, ene madame juive fine coquin. Madame-là ti sorti dans ene grand famille. Malgré ça Rassouloullah ‎(Sallallaahou A'laihi Wasallam)‎ fine donne l'ordre pou coupe so poignet. So la famille fine faire démarche pou ça pas arrivé. Mais Rassouloullah ‎(Sallallaahou A'laihi Wasallam)‎ pas fine cédé et fine dire:

"Par Allah! Si (par hasard) Fatimah aussi ti arrivé faire ça, mo ti pou coupe so la main. Acoze ça même banne Bani Israël fine périr parceki la loi ti pé appliqué lors banne ti dimoune seulement. Quand ene depi dans ene grand famille ti pé coquin, zotte ti pé laisse li."

Hazrat 'Oumar ‎(Radiyallahou anhou‎)‎ aussi pas fine hésité pou fouette so propre garçon pou ene certaine délit ki li ti commette. Ça c'était vraiment ene société idéale ki ou sur dimoune pou vine chez ou pou donne ou, ou droit dans ou la caze couma ene zenfant gagne dilait directe dans la bouche. C'est ene société cotte chaque dimoune ena le souci assume so responsabilité envers le zot ki réclame so droit. C'est ene société ki ti basé principalement lors ene seul kitchose. Et ça c'est la crainte d'Allah Ta'ala. Ou bien la croyance ou la conviction ki li pou bizin ranne compte pou tout ceki li fine faire et li pou être jugé sans ki li capave par kit moyen influence jugement.

[Extrait de Al Jamiat Vol.3 No.2]