Vie Sociale

Poids lourd

Ene machine puissant li capave amène ou bien vite lors ou destination. Par contre ene machine ki pas ça puissant-là li pou tarde ou. Mais parfois capave arrive le contraire. Par exemple ene machine faible ki fine gagne la route libre, li capave amène ou vite. Et l’autre coté ene machine so puissance et so rapidité pas pou capave faire narien si li fine gagne ene poids lourd devant li.

“Vrai zomme”

Après ene dispute entre deux frères, ene frère dire ek so l'autre frère : «Guette moi bien. Pena moi pose li pied divant to la porte.» Et vrai même li capave pas pose so li pied divant so la porte et li capave aussi pas alle cote li jamais, même à l'occasion ene malheur aussi. Ça dimoune-là li fier de ceki li été et de ceki li fine faire. Et dimoune aussi apprécié li pou so fermeté. Pourtant ça manière-là li ti pou bon seulement si d'après shariah li obligé ou bien recommandé servi li.

L’équilibre dans la société

Insaan pas fine crée ça le monde-là. Donc pas insaan ki pou capave décidé couma ça le monde-là bizin roulé. Et insaan même pas fine crée par li même. Li ena ene créateur ki fine donne li l’existence. C’est le créateur suprême même ki bizin décidé couma ça insaan-là bizin vive lors ça la terre-là. Insaan fine commette ene grave erreur. Li fine prend li comme propriétaire de ça le monde-là. Li fine prend li comme l’administrateur de ça le monde-là. Pourtant ena ene Créateur Suprême pou tout ceki nou trouvé devant nou et pou tout ceki nou pas conné.

La société

La qualité de ene société li dépanne lors la façon d’agir et comportement de banne dimoune dans ça société-là. Et comportement ene individu li dépanne lors la qualité éducation et formation.

Société idéale

La connaissance faire ou conne ou droit et ou devoir. Et la sincérité faire ou assume ou devoir avant réclame ou droit. Chaque dimoune pou gagne so droit automatiquement avec facilité quand chaque dimoune conne assume so devoir et so responsabilité. Ene société cote chakene gagne so droit c’est ene société vraiment idéale et prospère. Et ça li réalisable quand chakene assume so responsabilité convenablement. Donc la prospérité li trouve dans promouvoir connaissance de Deen et dans inculqué la sincérité.

Ene peuple libre et ene pays indépendant

Ene pays li vine ene pays par banne dimoune ki vive dans ça pays-là. Ene pays développé c’est ene pays ki so banne citoyens développé. Li pas nécessaire ki ene pays vine riche par so banne ressources naturel. Sinon combien pays ena ki bien bien riche en ressources naturel mais zotte banne pays bien même sous développé. Tout dépanne lors banne dimoune ki reste dans ça pays-là.

Bien être de la nation

Ene gouvernement li pretanne vouloir le bien être de la nation et en vérité ça même li bizin faire. Pou assume ça responsabilité-là, gouvernement li prend banne mesure nécessaire. Li mette banne la loi pou empêche accident. Ou trouve ena banne camera partout pou surveille banne ki pé roule vite. Nou ena l’hôpital, dispensaire, centre médical, parcours de santé ki garanti nou la santé. Lecol, collège, université etc pou nou l’éducation. Malgré tout ça-là, présence taverne dans ene gouvernement ki pretanne le bien être de la nation li intriguant.

Syndicate content