“Vrai zomme”

Après ene dispute entre deux frères, ene frère dire ek so l'autre frère : «Guette moi bien. Pena moi pose li pied divant to la porte.» Et vrai même li capave pas pose so li pied divant so la porte et li capave aussi pas alle cote li jamais, même à l'occasion ene malheur aussi. Ça dimoune-là li fier de ceki li été et de ceki li fine faire. Et dimoune aussi apprécié li pou so fermeté. Pourtant ça manière-là li ti pou bon seulement si d'après shariah li obligé ou bien recommandé servi li. Mais si fine servi li acote pas gagne droit d'après shariah, alors li pas ene bon manière. Ça appelle la tète dure et la personne li ene dimoune têtu. Et ça li émane de l'orgueil.

L'orgueil li ene faille zafaire ki ene tigite narien ditou couma ene la grain moutarde aussi li sufi pou empêche ene dimoune rente dans jannat. Ou croire ene dimoune intelligent capave développe ene manière pareil ou bien li capave permette li reste avec ene manière pareille sans corrige li ? Ene manière ki brise ou l'avenir et li pou faire ou souffert ? Acoze ça c'est ene dimoune imbécile même capave développe ou nourri ene manière pareille. Donc ene orgueilleux c'est ene vrai imbécile.

Ki faire nou pas faire ça avec shaitaan ? Ki faire nou pas dire : «Shaitaan, guette moi bien. Pena toi gagne moi. Mo pas pou remette mo li pied divant casino. Pena moi quitte namaz. Pena moi écoute toi.» Couma li ti pou bon si nou ti agir avec shaitaan avec même fermeté couma nou agir avec nou proche pou montré soi disant nou «ene vrai zomme». Nou bizin déclare vrai zomme avec shaitaan. Et ça li pou réalisable si nou faire tawbah sincère de tous banne manquements. Nou prend ene décision pou pas faire kitchose ki Allah pas content. Et nou dimane douah avec Allah ki li garde nou ferme. C'est ça ki appelle vrai zomme. Sinon nou pou toujours couma ene drome vide. Ene drome vide ki apart faire tapage pena narien dans li. Ene drome ki bon zisse pour cachiette ban voleurs Ali Baba comma l'orgeuil, la jalousie, rancune etc.

[Extrait de Al Jamiat – Vol. 6 No. 8]