La société

La qualité de ene société li dépanne lors la façon d’agir et comportement de banne dimoune dans ça société-là. Et comportement ene individu li dépanne lors la qualité éducation et formation.

L’éducation li aide ene dimoune pou conné ceki li bizin faire et la façon ki li bizin faire li. Et formation li développe et inculqué la volonté pou agir d’après ceki li conné. Par exemple l’éducation li aide ene dimoune pou conné ki cause menti li ene pratique détestable et dégoutant ki ene dimoune vraiment sérieux et respectable pas capave commette li. Mais travail-la pas termine la même. Dimoune-là li bizin ena la volonté aussi pou applique li. Sinon li pou reste couma ene théorie fermée dans livres ou bien couma ene zistoire ki necque li joli pou raconté. Bizin forme dimoune-là pou gagne la volonté applique li c'est-à-dire la volonté pou cause vrai et pas cause menti. Sinon tout dimoune même conné ki cause menti li bien pas bon. Malgré ça dimoune pas arrete cause menti quand li trouve certaine l’avantage dans faire li. Coumsa même dimoune pas hésité commette ene quantité kitchose grave pou banne l’avantage personnel.

Quant à ene personne bien formée, li pou cause vrai quand même ça faire li perdi banne l’avantages. Pou ene dimoune pareil, cause vrai li pli valeureux ki banne l’avantages ki li fine perdi. Si li trouve ene objet de valeur ki fine égaré quelque part, li pou faire li ene devoir pou remette ça à so propriétaire. Li pou faire li quand même personne pas fine trouve li ramasse ça objet-là. Ça li vini dans ene dimoune quand li gagne la volonté pou mette en pratique ceki li conné. Le développement de ça volonté-là li dimane ene formation ki manqué en général. Acoze ça, malgré zeffort énorme dans le domaine l’éducation, nou incapable pou dresse la société. Zordi jour nou fine contente nou avec l’éducation. De coté formation nou pas fine faire presque narien. A tel point ça génération-là nepli conne valeurs morales.

Et ceki li conné aussi, ça fine reste renfermé au niveau savoir sans li ena la volonté et l’intérêt pou implémente li. Banne instances religieux aussi pas fine reste à l’abri de ça négligence-là. Finalement de coté formation fine négligé totalement. Et de coté l’éducation, nou capave dire ki travail-là pas fine faire couma bizin. Donc li dimane ene ajustement.

[Extrait de Al Jamiat Vol.8 No.2]