Vie Sociale

Souvent nou cause ene causé sans prend compte et pourtant li capave bien grave et blessant. Bizin toujours cause bien avec nou prochain. Li pas bon ditout pou offense kikene. C’est ene manière ki bizin corrigé. Li bien facile pou nou corrige nou si nou ena la volonté. Avant nou cause ene causé, nou bizin mette nou dans place ça dimoune ki nou ena l’intention adresse li. Coumaniere nou ti pou senti nou si dimoune ti dire nou ene causé pareil. Et dans ki façon nou ti pou content dimoune adresse nou et corrige nou si jamais nou fine faire kit erreur.

Allah Ta'ala fine crée insaan libre. Allah Ta'ala fine dessane Deen pou chaque dimoune capave jouir so liberté parceki Deen li montré chakene so droit et so devoir. Dimoune ena tendance rode so droit avant exécute so devoir. Et ça aussi, li rode so droit plis ki li mérité et l'autre coté li néglige so devoir. Ça li amène li pou prive lezot de zotte droit. Alors bizin mette ene l'ordre pou personne pas faire personne souffert.

Grand frère bizin agir couma grand frère dans la caze. Li bizin donne bon l’exemple à banne pli petit ki li dans la caze. Si grand frère même pas conne habille bien, bé ki l’exemple li pou donne so banne ti frères ! Si li même li pou vive dans ‘short’ dans la caze, alors banne tipti-là capave faire plis ki ça. Dans ça cas-là c’est grand frère même ki pou responsable.