Ene peuple libre et ene pays indépendant

Ene pays li vine ene pays par banne dimoune ki vive dans ça pays-là. Ene pays développé c’est ene pays ki so banne citoyens développé. Li pas nécessaire ki ene pays vine riche par so banne ressources naturel. Sinon combien pays ena ki bien bien riche en ressources naturel mais zotte banne pays bien même sous développé. Tout dépanne lors banne dimoune ki reste dans ça pays-là.

Si nou suive ça raisonnement-là, ça amène nou pou dire ki ene pays libre et indépendant c’est ene pays ki so banne dimounes zotte libre et indépendant. Sinon avec ene mentalité zougadere rempli de l’égoïsme et l’esprit malicieux, ene pays jamais capave vine indépendant malgré ki li capave pé fête so l’indépendance pendant des décennies ou des siècles.

Ene pays ki promouvoir le course, casino, boite de nuit, c’est ene pays ki pé ranne so lepep esclave. Lepep-là li vine esclave de so banne passions et de so banne désirs. C’est ene lepep ki jouir lors cadavre de so semblable et ki enrichi par ranne so semblable sans l’emploi, sans mangé boire et sans domicile par ranne li de plus en plus misérable. Dans ene l’état pareil, cot pou ena liberté et couma l’indépendance pou existé ? Li difficile pou montré ene l’état vraiment indépendant de ça genre-là. Ça type de liberté et l’indépendance-là capave existé à titre individuel mais pas au niveau l’état. Li réalisable uniquement dans ene pays ki li trouve sous bannière de l’Islam dirigé par banne dirigeants compétent, justes, intègres et honnêtes ! Ça bizin attane Imam Mehdi même sa.

[Extrait de Al Jamiat Vol.7 No.11]