L'amour pou Rassouloullah ‎(Sallallaahou A'laihi Wasallam)‎ et so sounnat

Ene personne ti ena 1000 Dinar en so possession. Li ti pé préparé pou li alle faire hajj. Quand tout fine fini paré et li pé alle faire hajj, en route li joine ene madame. Madame-là dire ki li ene descendant Nabi ‎(Sallallaahou A'laihi Wasallam)‎ et li dans ene grand difficulté. Ça personne-là fine dévide tout ceki li ti ena avec li et li fine donne ça madame-là. Acoze ça li pas fine capave alle faire hajj et li fine retourne so la caze.

Apres hajj, tous banne hajis ki joine li pé souhaite li Hajj Maqboul c'est-à-dire ene hajj ki fine accepté. Ça fine étonne li et li commence casse so la tête ki manière dimoune pé souhaite li ça quand tandis ki li pas fine alle faire hajj. A soir li fine rêve Rassouloullah ‎(Sallallaahou A'laihi Wasallam)‎ ki fine informe li ki Allah Ta'ala fine crée ene farishta dans (ça personne-là) so forme ki fine faire hajj dans so part. En plus de ça, Rassouloullah ‎(Sallallaahou A'laihi Wasallam)‎ fine annonce li ki ça farishta-là pou continué faire hajj de so coté ziska Qiyaamat acoze ki li fine aide ene descendant de Nabi ‎(Sallallaahou A'laihi Wasallam)‎.

(Raddul-Muhtaar)

Quand ça dimoune-là ti aide ça madame-là, li ti faire li acoze ça l'amitié ki li ti ena avec Rassouloullah ‎(Sallallaahou A'laihi Wasallam)‎. L'amitié pou Rassouloullah ‎(Sallallaahou A'laihi Wasallam)‎ li ene kitchose très très noble, exalté et beni. Donc ceki ça personne-là fine bénéficié, c'était acoze ça l'amitié ki li fine montré pou Nabi ‎(Sallallaahou A'laihi Wasallam)‎ à travers ça aide ki li fine accorde ça madame-là.

Suive Nabi ‎(Sallallaahou A'laihi Wasallam)‎ so sounnat et so principe li encore pli béni ki ça. Par ça, nou capave gagne ene l'idée ki quantité bénédiction dessane lors ene dimoune ki content Rassouloullah ‎(Sallallaahou A'laihi Wasallam)‎ et li suive so sounnat.

Malheureusement nou pas fine conne valeur ça l'amitié-là. Nou fine donne nou le cœur tout qualité malpropreté et nou senti nou fier dans suive zotte principe malpropre. Et pas fini! Nou fine qualifié suive Nabi ‎(Sallallaahou A'laihi Wasallam)‎ de l'extrémisme! Quand tandis ki suive Nabi ‎(Sallallaahou A'laihi Wasallam)‎ li faire Allah Ta'ala content nou et ça faire Allah Ta'ala dessane so bénédiction lors nou. Lezot capave pas conne ça ou bien zotte capave pas croire là-dans. Mais nou, nou bizin conné ki c'est Nabi ‎(Sallallaahou A'laihi Wasallam)‎ ki bizin nou pli grand bien-aimé. Et ça, nou pas pou prouve li par necque dire avec la bouche. Nou bizin montré li par suive so sounnat dans entier nou la vie. Ena ene grand lumière dans Nabi ‎(Sallallaahou A'laihi Wasallam)‎ so sounnat. Celui ki pou mette ca en pratique, li pou illumine so la vie dans dounia, dans Qabar et dans Aakhirat. Et ça même li ene pli grand preuve ki li content Nabi ‎(Sallallaahou A'laihi Wasallam)‎.

اللهم ارزقنا حبك وحب نبيك محمد صلى الله عليه وسلم

O Allah! Accorde moi to l'amitié et l'amitié de to Nabi Mouhammad ‎(Sallallaahou A'laihi Wasallam)‎.

[Extrait de Al Jamiat Vol.3 No.2]