Sourat-ul-Kahf

Ça sourah-là li relate nou trois l'événement très importants ki fine arrivé auparavant:

1. Zistoire ene groupe de jeunes ki ti alle cachiette dans ene Kahf (la cave) pou sauve zotte Deen et zotte Imaan. Par ça rapport-là fine appelle li sourah Al-Kahf.
2. Zistoire Hazrat Moossa ‎(Alaihis Salaam)‎‎ quand li ti gagne l'ordre pou alle joine Hazrat Khidr ‎(Alaihis Salaam)‎‎.
3. Zistoire Zul Qarnain ki ti voyagé et ti faire tourné entier le monde.

Ça sourah-là ti révélé pou repone banne questions ki banne kaafir et banne moushrik de Makkah ti pose nou Nabi ‎(Sallallaahou A'laihi Wasallam)‎ lors conseille banne juifs de Madinah. C'était dans le but pou testé si Hazrat Mouhammad ‎(Sallallaahou A'laihi Wasallam)‎ li ene Nabi. Quand banne-là ti pose question, nou Nabi ‎(Sallallaahou A'laihi Wasallam)‎ ti promette zotte pou réponne zotte le lendemain lors l'espoir ki li pou gagne révélation. Mais dans ça promesse-là, Nabi ‎(Sallallaahou A'laihi Wasallam)‎ pas ti dire INSHA-ALLAH. Alors le lendemain pas fine ena aukene révélation. C'est necque après 15 jours ki wahi fine dessane. Rassouloullah ‎(Sallallaahou A'laihi Wasallam)‎ fine gagne conseil pou dire toujours INSHA-ALLAH concernant ene kitchose ki li ena l'intention faire dans l'avenir.

Ena banne bienfaits énormes dans récite sourah Al-Kahf partiellement ou intégralement. D'après ene hadice rapporté par Hazrat Abou Dardah ‎(Radiyallahou anhou‎)‎ ki trouve dans Sahih Mouslim, Rassouloullah ‎(Sallallaahou A'laihi Wasallam)‎ fine dire ki celui ki apprane les 10 premiers verset de sourah Al-Kahf, li pou être protégé de Dajjaal. D'après ene l'autre hadice, Rassouloullah ‎(Sallallaahou A'laihi Wasallam)‎ fine dire ki celui ki récite le commencement et la fin de sourah Al-Kahf, li pou ena ene Noor (lumière) ki pou couvert li depi so lipied ziska so la tête. Et celui ki récite li complètement, li pou ena ene Noor depi la terre ziska le ciel.

D'après ene hadice ki trouve dans Al-Moustadrak de Al-Haakim, li recommandé pou récite ça sourah-là tous les Jum'ah. Selon ça hadice-là, celui ki récite li le jour de jum'ah, li pou ena ene Noor ki pou éclairé devant li ziska l'autre Jum'ah.

[Extrait de Al Jamiat Vol.3 No.3]