Content ou pas content !

Ou pas capave force ou pou content kikene ou bien content ene kitchose. Coumsa même ou pas capave force ou pou détesté li aussi. C'est ene kitchose ki vine par li même dans ou. Mais pas tout kitchose ki nou content nou bizin faire li. Coumsa même pas tout kitchose ki nou détesté nou bizin néglige li. Allah Ta'ala fine donne nou l'intelligence pou nou choisir entre bon et mauvais. Ene kitchose pas vine bon acoze ki nou content li ou bien acoze ki nou oulé li. Coumsa même li pas vine mauvais acoze ki nou détesté li. Nou capave content ene kitchose ki pas bon pou nou. Couma nou capave ena dégoût pou ene kitchose mais pourtant li capave bien bénéfique pou nou. Allah Ta'ala dire:

"…. Et capave ou détesté ene kitchose ki pourtant li bon pou ou (couma) capave ou content ene kitchose ki pourtant li mauvais pou ou. Et Allah ki conné mais ou, ou pas conné". (S2 /V216)

Donc nou ena quatre qualités kitchose:

1. Ene kitchose ki nou content li et li bon aussi pou nou,
2. Deuxièmement ene kitchose ki nou content li mais li pas bon pou nou,
3. Troisièmement ene kitchose ki nou détesté li et li pas bon aussi pou nou,
4. Et quatrièmement ene kitchose ki nou détesté li mais li bon pou nou.

Dans tout ça-là nou bizin considère necque ça kitchose ki bon pou nou sans nou guetté ki nou content li ou bien nou détesté li.

Pou conné ki bon et ki mauvais, nou bizin guette ceki Allah Ta'ala et so Rasool ‎(Sallallaahou A'laihi Wasallam)‎ fine dire. Ceki Allah Ta'ala et so Rasool ‎(Sallallaahou A'laihi Wasallam)‎ fine déclare li bon, ça même ki bon. Et ceki Allah Ta'ala et so Rasool ‎(Sallallaahou A'laihi Wasallam)‎ fine qualifié li de mauvais, ça li mauvais quand même combien nou capave content li.

L'essentiel nou bizin pas laisse nou emporté par l'amour ou dégoût ki nou ena pou certaine kitchose. Nou bizin toujours agir selon ceki Allah Ta'ala et so Rasool ‎(Sallallaahou A'laihi Wasallam)‎ fine tracé pou nou. En faisant cela, nou pou toujours engagé dans jihaad sans ki nou alle dans champ de bataille ou bien sans tappe ene coute sabre.

[Extrait de Al Jamiat Vol.3 No.10]