Yameen

Attention! Li pas Yemen. C'est Yameen ki signifié la force. La main droite aussi appelle Yameen parceki en principe ene dimoune li ena pli boucou la force dans so la main droite.

Serment aussi appelle Yameen parceki ça li renforci la volonté ene dimoune pou faire ou pas faire ene kitchose. Longtemps dimoune ti ena l'habitude lève la main droite quand zote ti pé faire serment. Peut être par ça rapport-là aussi appelle li Yameen.

Dans faire Yameen ou faire serment, ene dimoune li ena tendance prend nom ene kitchose ki li considère li ene kitchose ki ena valeur. C'est peut être par ça même l'esprit ki souvent nou trouve dimoune faire serment par pose la main lors la tête so zenfant ou bien so madame ou bien ene kikene ki bien cher à li. Banne dimoune ki ena grand estime pou banne créature couma soleil du feu ou bien lezot kitchose, zotte faire serment lors ça banne kitchose-là. Mais pou ene musulman, pena narien pli cher ki Allah Ta'ala.

Acoze ça ene musulman, li faire serment zisse lors nom Allah Ta'ala. Li vrai ki Nabi ‎(Sallallaahou A'laihi Wasallam)‎ li pli cher ki tout kitchose après Allah Ta'ala pou ene musulman. A tel point, ki ene musulman bizin content Rassouloullah ‎(Sallallaahou A'laihi Wasallam)‎ plis ki so mama papa, so zenfant et plis ki l'humanité entier et plis ki li même. Mais malgré ça, pas gagne droit faire serment lors nom Rassouloullah ‎(Sallallaahou A'laihi Wasallam)‎ parceki Rassouloullah ‎(Sallallaahou A'laihi Wasallam)‎ même fine dire:

"Allah Ta'ala empêche ou faire serment lors nom ou banne grand dimoune. Celui ki ena pou faire serment, alors soit li faire serment lors (nom) Allah ou bien li reste tranquille."

Donc bizin faire serment lors nom Allah tout seul. Pas lors nom personne apart Allah Ta'ala. Quant à banne serments ki Allah Ta'ala même fine faire lors so banne créatures couma le ciel, la terre, soleil, la lune, etc. dans Qour'aan-e-Kareem c'est necque pou montré zotte l'importance ki zotte ena dans la vie insaan. Ça li pas ene preuve ki nou aussi nou capave faire li parceki nou bizin faire ceki shariat fine ordonne nou pou faire. Nou pas bizin guette ceki Allah Ta'ala fine faire. Nou bizin guette ceki Allah Ta'ala fine donne l'ordre pou faire. Allah Ta'ala li ena droit faire ceki li oulé. Donc li ena droit faire serment lors nom ki li oulé parmi so banne créatures.

Nou ena trois qualités Yameen:

1. Yameen Laghw

2. Yameen Ghamousse

3. Yameen Moun-aquidah

1. Yameen laghw : C'est ene déclaration ki ene dimoune faire avec banne formule de serment sans l'intention faire serment et sans li pense pou faire serment. Ça li pena aukene l'effet.

2. Yameen ghamousse: C'est ene fausse serment ki ene dimoune faire lors ene kitchose ki fine traversé. C'est-à-dire ene dimoune li faire serment ki li fine faire ene kitchose mais pourtant li pas fine faire ou bien li faire serment ki li pas fine faire ene kitchose ki pourtant li fine faire. Donc li fine prend nom Allah et li fine cause menti. Ça li ene péché bien grave parceki selon ene hadice ki trouve dans Sahih Boukhari. Rassouloullah ‎(Sallallaahou A'laihi Wasallam)‎ fine qualifié ça de ene péché grave et fine classifié li parmi banne péchés majeurs. Li dimane faire tawhah sincère pou efface ça péché-là.

3. Yameen Moun-aquidah: c'est ene serment ki ene dimoune faire a propos ene kitchose ki li decide faire li ou pas faire li dans l'avenir. Par exemple ene dimoune li faire serment lors nom Allah Ta'ala ki li pas pou mange tel kitchose ou bien li pas pou cause avec tel dimoune ou bien li pas pou alle dans tel place. Quand ene dimoune fine faire ene serment pareil, li bizin respecté li. Li pas bizin casse so serment. A moins si li ene serment ki contre Shariah alors li bizin casse ça serment-là. Par exemple li faire serment pou pas cause avec ene Imam dans so l'endroit mais pourtant Imam-là pena aukene tort. Dans ça cas-là li bizin casse so serment.

Ene serment li cassé quand dimoune-là faire ça kitchose ki li ti faire serment pou pas faire li. Disons si li ti faire serment pou pas mange ene kitchose alors so serment pou cassé quand li pou mange ça kitchose-là.

Quand ene dimoune li casse so serment, li bizin donne ene Kaffaarah. Kaffaarah li couma dire ene l'amane ki répare ça erreur ou gravité ki li fine commette par casse so serment.

D'après Qour'aan-e-Kareem, ene dimoune ki fine casse so serment, bizin nourri dix pauvres avec ene nourriture moyenne ki dimoune en général consommé ou bien donne dix pauvres chakene ene-ene rechange linge, ou bien libère ene esclave. Et si ene dimoune pena le moyen faire ene de ça trois kitchose-là, alors li bizin garde trois roza consécutifs.

Si ene dimoune choisir pou donne banne pauvres mangé pou so Kaffaarah, alors li bizin donne zotte deux l'heure repas. Si li oulé, li capave donne chakene valeur ene fitra au lieu donne mangé.

Li bon conné ki tanque capave ene dimoune bizin pas faire serment quand même lors ene kitchose ki vrai aussi. Parceki ene l'habitude pareil, après ene certaine le temps, li faire li manque du respect pou nom Allah Ta'ala et ça capave vine ene moyen pou faire fausse serment. Donc bizin pas prend ene l'habitude pareil.

[Extrait de Al Jamiat Vol.3 No.12]