Ta'leeq-ut-Talaaq

Ta'leeq-ut-Talaaq signifié attache talaaq avec kit condition. Par exemple ene missié dire so madame:

"Si to cause avec tel dimoune, alors to ena ene talaaq."

Ça façon attache talaaq-là appelle Ta'leeq-ut-Talaaq. Si jamais ça madame-là fine cause avec ça dimoune-là, alors ene talaaq pou prend l'effet. Coumsa même si missié-là fine attache deux talaaq ou bien trois talaaq, alors ça quantité talaaq-là même pou porté. Si par malheur li fine attache trois talaaq avec kit condition et ça condition-là fine réalisé, alors tous les trois talaaq pou porté.

D'après ene récit ki trouve dans Sahih Boukhari, Hazrat Nafi' fine dimane à propos ene dimoune ki fine donne so madame ene talaaq irrévocable et li fine attache ça talaaq-là avec condition si ça madame-là li sorti en dehors la caze. Lors ça Hazrat Abdullah Bin 'Oumar ‎(Radiyallahou anhou‎)‎ fine repone:

"Définitivement madame-là pou séparé avec missié-là si li sorti. Et si li pas sorti, ça pas pou compte narien."

Selon ene l'opinion plis ki isolé, ça façon donne talaaq-là li pas valable. Mais selon Allaamah Aboul Hassan As-Subki (R), d'après le consensus de banne Sahaba-e-Kiraam, Tabeines, Taba-Tabeines, les sept fouqaha (juristes) de Madina et banne 'Oulama en général de tous le temps, ça talaaq-là li porté et li prend l'effet si jamais condition fine réalisé. L'opinion ki dire ki ça pas compté, li ene l'opinion ki pas mérite aukene considération parceki li en flagrant conflit avec ijma (consensus) de banne Sahaba-e-Kiraam et banne Tabeines.

[Extrait de Al Jamiat Vol.3 No.14]