Valeur dounia

Banne ki pé galoupe derrière dounia, zotte pou conne valeur zotte la caze, zotte l'auto, zotte campement, zotte travail et zotte du bien en général quand pou déshabille zotte pou donne zotte ghoussal et pou mette kafan lors zotte. C'est ene moment quand tout la vérité pou dehors. Tout maquillage pou tombé. Dans ça l'heure-là, nou pou conné ki narien pas pou servi nou. C'est necque nou banne action ki pou accompagne nou. Ça dounia ki fine vine fou derrière li, pou trahir nou ça jour-là. Et c'est ça banne bonne actions ki nou ti pé trouve li dur-là ki pou sincère avec nou.

Dans ene hadice, Nabi ‎(Sallallaahou A'laihi Wasallam)‎ fine dire:

"Ena trois kitchose ki accompagne ene dimoune ziska cimetière. Là-dans deux retourné et necque ene seul ki reste avec li. So du bien, so la famille et so action accompagne li ziska cimetière. So du bien et so la famille zotte retourné. C'est necque so action ki reste avec li."

[Extrait de Al Jamiat Vol.3 No.14]