Arrête vive dans haraam!

Si ou fine donne ou madame tous les trois talaaq ene seul coup, ou pas gagne droit continué vive avec li. Si ou pé vive avec li, bé ou pé vive dans haraam. Si la mort zoine ou dans ça l'état-là, ça veut dire ki ou pé mort dans ene l'état ki ou ti pé vive dans haraam. Coumsa même si ou missié fine donne ou trois talaaq, pas bizin ou retourne avec li sinon ou pou vive dans haraam tous les temps.

Dimoune capave vine dire ki trois talaaq-là li compte ene seul. Ou bizin conne dire li ki li pas conne plis ki Hazrat 'Oumar ‎(Radiyallahou anhou‎)‎ et banne Sahaba-e-Kiraam en général ki fine ranne verdict ki trois talaaq compte trois même. Li pou essaye attaque ou et li pou dire ki dans l'époque Rassouloullah ‎(Sallallaahou A'laihi Wasallam)‎ trois ti compte ene seul. Si ena pou choisir entre Rassouloullah ‎(Sallallaahou A'laihi Wasallam)‎ et Hazrat 'Oumar ‎(Radiyallahou anhou‎)‎, bizin prend ceki ça ti été dans l'époque Rassouloullah ‎(Sallallaahou A'laihi Wasallam)‎.

Ou capave repone li ki nou bizin suive Nabi ‎(Sallallaahou A'laihi Wasallam)‎ mais li pas vrai ki trois talaaq ti compte ene seul dans l'époque Nabi ‎(Sallallaahou A'laihi Wasallam)‎. Et si li fine comprend ça coumsa, alors li fine mal comprend et li bizin poursuive so l'étude et so recherche.

Deuxièmement ou ena droit dimane li si li comprend Deen et l'enseignement de Rassouloullah ‎(Sallallaahou A'laihi Wasallam)‎ plis ki Hazrat 'Oumar ‎(Radiyallahou anhou‎)‎ et banne Sahaba-e-Kiraam. Eski li conne pli bien ceki ça ti été dans l'époque Nabi ‎(Sallallaahou A'laihi Wasallam)‎ après 1400 bananés ou bien Hazrat 'Oumar ‎(Radiyallahou anhou‎)‎ et banne Sahaba-e-Kiraam ki fine vive avec Rassouloullah ‎(Sallallaahou A'laihi Wasallam)‎. Pas bizin li repone pou conne la vérité. Ça quantité-là même assez pou éclairci ça point-là. Mais banne ki fine faire serment pou suive Allaamah Bin Taimiyah aveuglement dans tout ceki li dire, zotte pou continué garde zotte promesse quand même ça li conte tous banne Sahaba-e-Kiraam et entier l'Oummah. Le problème li repose lors "pas conné" ou bien "déclare pas conné" ou bien "persisté pou pas conné" ou bien "suive banne aveugles aveuglement".

[Extrait de Al Jamiat Vol.4 No.1]