Halaal, Haraam et Moushtabihaat

Halaal li bien clair et haraam (aussi) li bien clair. Et entre ça deux-là ena boucou kitchoses ambiguës ki boucou dimoune pas conne zotte (position légale). Celui ki évite banne kitchoses ambiguës, veut dire ki li fine protége so Deen et so l'honneur et celui ki tombe dans banne kitchoses ki ena doute, li couma dire ene berger ki faire (ene troupeau zanimau) brouter autour de ene réserve en sorte ki ena tout possibilité li capave tombe là-dans. Tout le roi ena ene réserve. Certainement Allah Ta'ala so réserve lors so la terre, c'est banne kitchoses ki li fine interdit. Certainement ena ene morceau la chaire dans le corps quand li dressé, entier le corps dressé et quand li corrompu, entier le corps corrompu. Attention ça morceau la chaire-là c'est le cœur." (Boukhari)

Explication:

Halaal li bien clair signifié ene kitchose ki couvert et régi par ene texte de loi ki autorise ça kitchose-là dans ene façon categorique. Par exemple la viande bœuf, mouton, cabri etc.

Coumsa même haraam li bien clair veut dire ene kitchose ki régi par ene texte de loi ki defanne ça kitchose-là dans ene façon nette et claire par exemple mensonge, zina, la viande porc etc. Entre ça deux kitchose-là ena ene catégorie ki appelle مشتبهات (moushtabihaat).

Ki veut dire moushtabihaat?

C'est ene kitchose ki ena ene genre de confusion parceki ena tous les deux possibilités. C'est-à-dire li capave halaal couma li capave haraam acoze ki ena tous les deux qualités preuve. Quand nou guette ene, li donne l'impression ki li bizin halaal et quand nou considère l'autre preuve, ça faire nou hésité et empêche nou accepté li comme halaal.

Règlement concernant Moushtabihaat

Dans ene situation cote ene dimoune tombe dans ene dilemme pareil, Nabi ‎(Sallallaahou A'laihi Wasallam)‎ conseille li pou reste loin et pas alle de l'avant. Selon Nabi ‎(Sallallaahou A'laihi Wasallam)‎, c'est ene moyen pou ene dimoune préserve so Deen et so l'honneur. Pou explique ça, Nabi ‎(Sallallaahou A'laihi Wasallam)‎ fine donne nou ene l'exemple cote li fine compare banne kitchose haraam avec ene réserve. Couma ene dimoune ki amène so troupeau pou broute l'herbe près avec ene réserve ena toute chance ki so troupeau rente dans réserve, coumsa même ene dimoune ki faire négligence concernant banne kitchose douteux, li prend ene grand risque tombe dans haraam. Et conséquemment li mette en danger so Deen et so l'honneur.

Principe à adopté dans banne kitchose ki ena doute

Quand ena doute dans ene kitchose, d'abord bizin guette position ça kitchose-là d'après shariah. Si d'origine, ça kitchose-là li permette et li halaal, alors li pou continué reste halaal. Banne doutes ki vine dans l'esprit et ki pena aukene preuve ki soutenir li, pas capave affecté position ça kitchose-là.

Par exemple ene dimoune fine faire nikah en bonne et due forme. Alors so nikah pou continué reste valable. Ça nikah-là pas pou affecté avec banne doutes ki li capave ena concernant talaaq. Tanque li pas sure ki li fine donne so madame talaaq, so madame pou reste so madame et so nikah pou reste intacte. D'après ça même principe, si ene dimoune li rappel bien ki li ti faire wazou, mais li pas rappel si so wazou fine cassé, alors so wazou pou continué reste valable tanque li pas sure ki li fine cassé.

Ene l'autre l'exemple

Si ene dimoune gagne doute dans namaz ki so wazou fine cassé, alors li bizin continué so namaz et li pas gagne droit casse so namaz tanque li pas sure ki so wazou fine cassé.

Similairement si ene kitchose d'origine li haraam et interdit, alors li pou continué reste haraam tanque pas gagne preuve ki li halaal. Par exemple la chaire ene zanimau li haraam amoins si fine faire zabah ça zanimau-là d'après principe de shariah. Donc dans ce cas tanque pas assuré ki conditions et règlements de shariah fine être respecté dans faire zabah, pas pou gagne droit consomme so la chaire.

Coumsa même si dans ene panier ena banne poules mort ki fine mélangé avec banne poule halaal en sorte ki pas capave distingue banne poules ki halaal, alors dans ce cas pas pou gagne droit touche aukene poule là-dans.

Bref quand ene kitchose li halaal d'origine, li pas pou vine haraam tanque pas gagne ene preuve catégorique ki prouvé ki li haraam. Coumsa même quand ene kitchose li haraam d'origine, alors li pas pou vine halaal tanque perna preuve catégorique ki prouvé ki li halaal.

Was-wasa

Quant à banne supposition rare et lointaine, bizin pas prend compte parceki ça li vine de coté shaitaan ki oulé fatigue banne dimoune dans Deen. Par exemple ene madame li tire linge lors la corde et li relave li avec supposition ki banne zenfants fine capave touche ça banne linges-là avec la main ki ena impureté. Ou bien ene madame li lave la corde avant li mette linge sec par l'impression ki capave ena impureté lors la corde. Ou soit ene dimoune li lave banne pièces d'argent avant li garde zotte dans so poche par l'impression ki ça fine capave passe dans banne la main ki ena impureté. Bizin pas prend banne doutes pareille en considération.

Le cœur

Ene dimoune so comportement li dépanne d'après l'état de so le cœur. Si so le cœur li en bonne santé, veut dire ki so comportement en général aussi pou correcte. Par contre si ena kit manquement ou kit défection dans so le cœur, ça pou reflecté lors so comportement.

Dans ça hadice-là, fine mentionne le cœur ki normalement signifié ça l'organe ki trouve à gauche de la poitrine. Pareille couma les cinq sens: l'odorat, l'ouie, le goût, la vue et le touché, zotte fonctionne apartir néné, zoreille, palais, lizié et la main respectivement. Coumsa même ena ene sens bien subtile ki basé et fonctionné apartir le cœur. D'après banne 'Oulama, Rassouloullah ‎(Sallallaahou A'laihi Wasallam)‎ fine servi le terme "le cœur" zisse comme ene repère pou signifié ça sens subtile-là.

Toujours selon banne 'Oulama, ça sens-là c'est le centre d'attraction de Noor (lumière) de Hidayah (guidance). C'est ça même Noor ki faire ene insaan vine insaan. Quand Qour'aan et hadice cause purification du cœur ou de l'âme, ça li signifié la purification de ça même sens-là. Pou être pli simple, nou capave appelle ça kitchose-là mentalité. D'après ça hadice-là, tout dépanne lors ene dimoune so mentalité. Quand so mentalité li dressé, ça li ena ene l'effet très positif lors so comportement. Par contre avec ene faille mentalité, ene dimoune pou agir toujours mal. Rassouloullah ‎(Sallallaahou A'laihi Wasallam)‎ fine attire nou l'attention vers la nécessité de purification le cœur parceki ça même c'est la base de la réussite humaine.

Ça hadice-là amene nou pou comprend ki consomme banne kitchose haraam, li contamine le cœur ki à son tour affecté le comportement général de ene dimoune. Pou remédié le problème, Rassouloullah ‎(Sallallaahou A'laihi Wasallam)‎ conseille l'Oummah pou garde so distance non seulement de banne kitchose ki haraam, mais aussi de banne kitchose douteux afin pou assure ene prévention complète. Dans ene l'autre hadice, Nabi ‎(Sallallaahou A'laihi Wasallam)‎ fine exprime ça l'idée-là dans le terme suivant:

"Ene dimoune pas capave atteine le niveau pou être parmi banne personnages pieux tanque ki li pena la volonté pou quitte ene kitchose ki pena narien de grave zisse comme ene mesure de précaution pou pas tombe dans ene kitchose ki ena certaine gravité."

C'est-à-dire banne bon dimoune zotte pas hasardé. Zotte prend boucou précaution à tel point ki zotte reste loin de banne kitchose permissible aussi si ça capave vine ene moyen pou tombe dans banne kitchose ki pas permette.

[Extrait de Al Jamiat Vol.4 No.1]