At-Tafweez التفويض -

Tafweez veut dire ki ene dimoune soumette li totalement à la volonté d'Allah Ta'ala. C'est-à-dire li mette tous dans la main Allah Ta'ala et li accepté tout ceki Allah Ta'ala décidé. Li pas depanne lors personne ni li garde l'espoir lors kikene apart Allah Ta'ala. Ça c'est ene l'état d'esprit ki shariah recommane nou pou nou inculqué ça dans nou et ki ranne la vie ene dimoune bien facile.

Ene dimoune ki réussi inculqué ça caractère-là dans li, li bénéficié protection et aide de coté Allah Ta'ala. Et en même temps li gagne la tranquillité morale. Dans Qour'aan-e-Kareem, Allah Ta'ala relate nou l'événement ene personne dans la famille de Pharaon ki ti amène imaan en cachiette. Quand Pharaon fine menace Hazrat Moussa ‎(Alaihis Salaam)‎‎, alors ça personne-là fine plaidé en faveur Moussa ‎(Alaihis Salaam)‎‎. Après ça, banne-là fine menace li aussi pou touyé. Lerla li fine dire:

"وافوض امرى الى الله ..."

"Mo laisse mo problème à Allah Ta'ala …"

D'après tafseer kabeer de Allaamah Fakhruddeen Ar-Razi, ça personne-là fine sauvé et fine alle lors montagne. Quand banne l'ennemis fine vine guette li, zotte fine trouve li entouré avec banne zanimau féroce pé faire ibaadat. D'après ça même tafseer, banne zanimau-là fine agresse ça banne dimoune-là et fine touye zotte. Ene seul dimoune fine réussi retourne cote Pharaon. Mais Pharaon fine doute li et fine touye li aussi. Voila couma Allah Ta'ala li faire l'arrangement pou protége so serviteur quand so serviteur place so confiance dans Allah Ta'ala.

Ça pas signifié à aukene moment ki dimoune bizin necque place so confiance et li arrête faire zeffort. Li pas ça ditout. Ça signifié ki ene dimoune bizin faire so maximum zeffort pou gagne ene certaine kitchose et li faire doah avec Allah Ta'ala mais li laisse résultat dans la main Allah Ta'ala et li satisfait avec ceki Allah Ta'ala décidé. Faudré pas li exigé ki ça bizin arrivé couma li oulé. C'est ça même manière ki faire ene dimoune reste dans bouleversement tout le temps et empêche li gagne la tranquillité. D'abord li essaye pou calmé li avec banne comprimé et finalement arrive ene l'époque quand comprimé aussi arrête travail.

L'état dans l'état

Ça vilain manière-là appelle تجويز. C'est-à-dire quand ene dimoune mette ene plan diboute, li oulé ki ça li tourne couma li fine pensé. Si ena kitchose ki capave appelle li l'état dans l'état, alors ça vilain manière ki appelle "Tajweez" li pli mérite ça nom-là. Et l'état dans l'état li ene kitchsoe détestable. Alors تجويز li pli mérite être détesté parceki li représente ene genre d'ingérence dans décision divine. Kikene fine bien dire:

"Leave everything in Allah's hand, you will see Allah's hand in everything."

[Extrait de Al Jamiat Vol.4 No.3]