Positif et négatif

Si nou attane pou trouve tout kitchose positif dans ene dimoune, bé jamais nou pou satisfait avec kikene parceki plus ou moins tout dimoune même ena ene faiblesse ou ene certaine manquement. Mais chakene so faiblesse ou so manquement li d'après so niveau. Et nou bizin vive avec dimoune malgré so banne manquements. Sinon nou bizin retire nou dans ene la caze et amène la vie dans isolation. Finalement nou bizin conné ki nou aussi nou ena banne manquements, nou pas parfait. Si nou prend ça compte, veut dire ki nou bizin isole nou de nou même ki li impossible. Acoze ça nou bizin tolère lezot zotte manquements et vive nou la vie en société. Nou essaye pou bénéficié et profite banne bon coté ki nou camarade ena et nou évite ceki pas bon dans zotte. Selon ene hadice ki trouve dans Sahih Mouslim, Rassouloullah ‎(Sallallaahou A'laihi Wasallam)‎ fine dire:

"Madame fine créé avec ene cote travers ki jamais li pou continué reste droite dans ene seul manière. Alors si ou oulé profité avec li, ou capave profité malgré so manière travers. Mais si ou pense pou dresse li droite, ou pou alle casse li. Et ça cassé-là signifié donne li talaaq."

C'est-à-dire nou bizin ena la tolérance dans la vie si nou oulé vive ene bon la vie. Nou bizin conne ferme lizié avec certaine défauts ou manquements ki capave ena dans partenaire. Nou pas capave être trop méticuleux ou perfectionniste en ceki concerne lezot. Ça nou bizin faire li envers nou même. Sinon nou la vie pou vine difficile. La plupart parmi nou faire le contraire. C'est-à-dire li exigeant envers lezot et tolérant envers li même. Ça li applique pou certaine genre de défaut parceki ena manquement et ena certaine qualité défaut ki intolérable aussi.

Dans ene l'autre hadice ki trouve dans Sahih Mouslim même, Rassouloullah ‎(Sallallaahou A'laihi Wasallam)‎ fine dire:

"Faudré pas ene musulman li éprouve dégoût pou ene musulmane. Parceki si li détesté ene kitchose dans li, li capave satisfait avec ene l'autre manière ki li ena dans li."

C'est-à-dire ene dimoune bizin pas dégoûte so madame parceki personne pas parfait. Si li ena kitchose ki pas bon, li capave ena ene manière ki appréciable. Alors li bizin essaye blié va mauvais coté-là acoze ça l'autre bon coté-là.

Li paraite ki c'est à la lumière banne hadice semblable ki banne savants de hadice fine établi le principe selon lequel hadice de ene narrateur controversé li ene hadice acceptable et valable. Faudré pas pressé pou rejette ene hadice uniquement acoze présence ene certaine rawi ki fine être critiqué par ene groupe de savants de hadice.  Bizin prend en considération banne ki fine accepté li aussi. Si nou ena droit rejette li acoze banne critique, nou ena aussi droit prend li acoze l'appréciation ki li bénéficié de ene l'autre part. c'est ça même situation de ene rawi ki qualifié de مختلف فيه  (controversé) par banne savants de hadice. Et d'après banne 'Oulama couma Az-Zahabi, Al-Munziri, Ibnul-Humaam, Ibn Hajar, Jalaaluddeen As-Souyouti, ene hadice de ene tel rawi li qualifié de ene hadice hassan. 

[Extrait de Al Jamiat Vol.4 No.5]