Mode de vie complète

Allah Ta'ala fine établi ça mode de vie ki nou appelle Islam. Allah Ta'ala ena connaissance de tout kitchose. Narien pas en dehors so connaissance. Donc ça mode de vie-là li ene mode de vie complète parceki Allah Ta'ala même conné ki pli bon façon dimoune bizin amene zotte la vie.

Le passé, le présent et le futur, tout pareil pou Allah Ta'ala. Li conne ceki fine passé, ceki pé passé et ceki pencore passé. Tout ceki fine passé et ceki pé passé fine arrivé par Allah Ta'ala. Et ceki pencore passé aussi pou arrivé par Allah Ta'ala même. Donc ça Deen ki nou appelle Islam, couma li ti valable dans le passé, li valable pou zordi aussi. Et li pou valable pou tout le temps dans l'avenir aussi ziska Qiyaamat. Et li ene mode de vie ki capave adapté pou tout l'endroit et pou tout dimoune. Donc quand nou dire ki Islam li ene mode de vie complète ça signifié ki li ene mode de vie complète ki valable pou tout dimoune, dans tout l'endroit et pou tout le temps.

Connaissance dimoune divant connaissance Allah Ta'ala pas représente narien. Li couma ça humidité ki reste lors la becque ene zoiseau quand li plonge li dans de l'eau ki pas représente narien divant l'ocean. Donc tout système de vive ki dimoune fine inventé li ene l'échec total ki pas capave garanti le bien être banne dimoune lors la terre. Parceki le bien être pas veut dire necque gagne mangé, boire, amusé et lezot soin nécessaire. Pena aukene bien être sans la tranquillité morale. Et ça nou gagne li uniquement dans vive d'après ceki Allah Ta'ala fine choisir pou nou. Sinon ou capave entouré avec tout mais ou pas capave empêche ou la vie vine amer et vine ene fardeau pou ou.

[Extrait de Al Jamiat Vol.4 No.6]