Bizin obéir Allah Ta'ala partout

Ene dimoune bizin suive et respecté banne règlements de so patron tanque ki li reste dans so travail. Avant rente dans travail et après travail li libre pou li vive so la vie parceki li nepli ena kit l'engagement entre li et so patron dans ça banne l'heure-là. Mais Allah Ta'ala li nou Malik (patron) et nou Rabb pou tout le temps et partout. Et ziska tout le temps et partout nou pou reste so serviteur. Pena ene place ou ene l'heure ki nou arrête reste so serviteur. Alors nou l'engagement avec nou Rabb li existé partout et pou tout le temps. Acoze ça nou bizin reste dans l'obéissance Allah Ta'ala partout et tout le temps. Couma nou bizin obéir li dans masjid, nou bizin obéir li dans bazar aussi. Couma nou bizin suive so banne commandements dans le mois de Ramadhaan, nou bizin suive so banne commandements en dehors Ramadhaan aussi. Dans contentement, dans tristesse, dans bonheur, dans malheur et dans tout l'état nou reste so serviteur et nou bizin marche d'après so l'ordre même.

[Extrait de Al Jamiat Vol.4 No.6]