Façon vive

Ça la vie-là li pou ene deux-jours ça. Bizin vive li bien parceki pas pou regagne li encore. Vive ça la vie-là bien signifié vive li pou le plaisir de celui ki fine donne nou ça la vie-là. Ça ki sanla capave été apart Allah Ta'ala?

Allah Ta'ala même c'est le Créateur. Na pena aukene Créateur apart li. Donc nou bizin vive ça la vie-là pou faire li plaisir. Et ça li réalisable quand nou vive li d'après ki li fine donne l'ordre pou vive li. Si nou oulé trouve ça façon vive-là dans la pratique, nou ena necque pou guette la façon et le model de nou bien-aimé Nabi ‎(Sallallaahou A'laihi Wasallam)‎. Banne ki fine vive ça model-là, zotte fine amène ene la vie respectable. Zotte la vie fine vine profitable pou zotte même et pou lezot. Par contre banne ki fine dévié de ça mode de vie-là, zotte fine toujours ene nuisance et ene poids lourd pou la société.

Allah Ta'ala fine désigne nou Nabi ‎(Sallallaahou A'laihi Wasallam)‎ comme le seul model ki bizin suive pou amène ça la vie-là. Ça façon vive même ki faire insaan vine insaan et ça même façon vive ki faire li paraite insaan. Ça façon vive-là montré nou couma nou bizin garde nou l'intérieur et couma nou bizin entretenir nou l'extérieur. Celui ki pas fine vive li, veut dire ki li pas fine conne vive. Li bien chagrinant si nou pas conne vive ene la vie ki nou fine gagné pou bâtir nou aakhirat. Li couma dire ene candidat ki pas fine conne travail dans la salle l'examen. Ça dimoune ki pas fine conne vive ça la vie-là, li pli malheureux ki ça candidat-là parceki ça dimoune-là pas pou regagne ene l'autre l'occasion vive li ki pou capave permette li améliore so sort.

[Extrait de Al Jamiat Vol.4 No.6]