Couma rectifié ene erreur

Ene dimoune honnête li toujours content reste dans clarté. Acoze ça quand li conne so erreur, li pas hésité pou li reconnaite li et li rectifié li. Quand li rectifié so erreur, li faire li avec même l’ampleur ki li ti faire erreur. Disons li fine cause ene causé en public ki pas ti bon. Alors li bizin rectifié li aussi en public. Li pas sufi ki li reconnaite li en cachiette entre ene ti groupe dimoune. Faudré pas attane kikene mette pression pou accepté erreur ki ou fine faire. Ça li conte l’honnêteté. Ene dimoune honnête li corrige so erreur quand li arrivé conné quand même personne pas découvert so erreur aussi. Faudré pas li joué mort lors là même. Li bizin honnête envers banne dimoune et li pas laisse zotte reste dans noireté. Li bizin faire zotte conné si li fine mal enseigne zotte. Faudré pas déconcerté. Et ki faire bizin déconcerté quand ene dimoune li pas diminué par reconnaite so erreur. Au contraire li gagne ene dignité apart ki li pas ti pou gagne li dans reste tranquille. Mais faudré pas reconnaite ou erreur avec l’arrogance ou l’orgueil. Par exemple quand ene dimoune attire ou l’attention vers ene erreur ki ou pas capave dire narien, alors ou tini ene tas l’article et ou tourne droite gauche pou accepté li. Ça façon accepté erreur-là c’est ene façon orgueilleux ki bien pas bon. Pli simple ou accepté ki ou fine faire erreur et ou corrige li et ou faire banne dimoune conné ki ou fine faire erreur. Et li bon ki ou remercié dimoune ki fine attire ou l’attention vers ou erreur. Coumsa même si ou ena kit manquement au niveau comportement ou bien au niveau pratique, alors ou bizin accepté li si kikene montré ou, au lieu présente banne prétextes inutile pou justifié ou erreur. Peut être dans ene certaine mesure ou pou capave camouflé certaines kitchoses mais jour Qiyaamah tout pou démasqué.

[Extrait de Al Jamiat Vol.4 No.11]