La bouche

La bouche li ene grand faveur Allah Ta’ala. Couma tous banne faveurs Allah Ta’ala, bizin conne bien servi ça faveur-là aussi. Dimoune ki pas pé capave mangé avec zotte la bouche ou bien banne ki ena lezot complications, zotte capave conne valeur ça faveur-là ene ti pé plis ki lezot. Eski nou pé attane pou vine dans zotte place pou conne so valeur ? Ki Allah Ta’ala pas faire nou arrive dans ça situation-là.

Ça la bouche-là fine faire pou mangé-boire ceki halaal. Pou faire zikrullah. Pou faire tilaawat-ul-Qour’aan. Pou cause banne bon parole. Faudré pas nou salir li par banne parole grossier ou par zoure-zouré. Zordi jour nou ena banne ki pimente chaque phrase par ene zouré. Couma dire causé-là pas paraite ena goût sans mette ene zouré là-dans. Mais attention ! C’est la bouche ça. Quand même c’est la bouche ene dimoune. Pas ene dépotoir saleté. D’après ene hadice, ena dimoune parfois cause ene mauvais causé sans prend compte ki ça li jette li nette dans fond jahannam. Donc faudré pas sous-estime gravité cause causé malpropre et zoure-zouré entre banne camarades dans la rue divant tout dimoune. Nou bizin conne garde valeur nou la bouche parceki li ene moyen pou lire Allah Ta’ala so kalaam. Li pas ene dépotoir.

[Extrait de Al Jamiat Vol.4 No.11]