Ene dimoune ki so le cœur reste attaché avec masjid

D’après ene hadice ki trouve dans Sahih Boukhari et Sahih Mouslim, parmi banne dimoune ki pou gagne l’ombrage cote Allah Ta’ala jour Qiyaamah, nou ena ene dimoune ki so le cœur li retse attaché avec masjid.

"Le cœur reste attaché" signifié ene l'attachement fort. Ene dimoune ki so le cœur attaché avec masjid veut dire ki ça li continué reste dans so pensée à tel point ki li ena ene désir ardent pou passe presque tout so le temps dans masjid dans attane l'heure namaz. Li capave pas dans masjid mais so l'esprit li reste dans masjid tellement li attaché avec masjid. A chaque fois ki li fini faire ene namaz, li reste dans attane l'autre l'heure namaz. Ça li indique l'amitié fort ki li ena pou Allah Ta'ala parceki quand ene dimoune content kikene, li oulé reste divant so la porte. Donc celui ki oulé reste dans la caze Allah Ta'ala, c'est acoze ça l'amitié ki li ena pou Allah Ta'ala. Alors ça c'est ene état d'esprit très noble ki très appréciable dans lizié Allah Ta'ala.

Masjid c'est la caze Allah Ta'ala. Ene dimoune ki vine dans la caze Allah Ta'ala, li ene invité pou Allah Ta'ala. Chaque dimoune li recevoir so invité d'après so capacité dans ene façon pli correcte ki capave. C’est dans ça sens-là ki Allah Ta'ala pou honore so invité par accorde li l'ombrage enbas so Trône.

A noté ki ça li applique pou banne missié seulement parceki selon Nabi ‎(Sallallaahou A'laihi Wasallam)‎, pli bon place pou ene madame faire namaz, c'est ene l'endroit ki pli cachiette dans so la caze. Ene madame ki régulier et ponctuel dans so namaz et ki faire li dans ene l'endroit bien cachiette dans so la caze aussi pou bénéficié ça mérite-là.

Pli bon place pou madame faire namaz

L’endroit ki ti pli apprécié à l’époque Nabi ‎(Sallallaahou A'laihi Wasallam)‎ d'après Rassouloullah ‎(Sallallaahou A'laihi Wasallam)‎ pou banne madames faire namaz, c’était la caze. C'est-à-dire ene madame ena pli boucou récompense quand li faire so namaz dans so la caze parceki Rassouloullah ‎(Sallallaahou A'laihi Wasallam)‎ fine content ça même pou banne madames. Ceki Rassouloullah ‎(Sallallaahou A'laihi Wasallam)‎ fine content pou banne madames, li incomparablement pli bon ki ceki lezot pé suggère banne madames.

Hazrat Umme Salamah ‎(Radiyallahou anhou‎)‎ rapporté ki Rassouloullah ‎(Sallallaahou A'laihi Wasallam)‎ fine dire:

“Meilleure l’endroit pou faire namaz pou banne madames, li trouve dans l’intérieur de zotte la caze”.

Hazrat Abdullah Bin Mas’oud ‎(Radiyallahou anhou‎)‎ rapporté ki Nabi ‎(Sallallaahou A'laihi Wasallam)‎ fine dire :

“Meilleur namaz auprès d’Allah ki ene madame faire, c’est ça namaz ki li faire dans ene l’endroit pli noir dans so la caze” (Sahih Bin Khuzaimah)

Quand nou analyse ça hadice-là, ça donne nou ene l’idée ziska ki point, Rassouloullah ‎(Sallallaahou A'laihi Wasallam)‎ ti ena le désir pou trouve banne madames faire namaz chez zotte dans zotte la caze dans ene coin retiré, renfermé et pli cachiette ki capave.

Namaz dans Masjid Nabawi

Couma nou conné, ena boucou récompense dans faire namaz dans masjid Nabawi. Dans ene hadice rapporté par Hazrat Abou Hourairah ‎(Radiyallahou anhou‎)‎, Rassouloullah ‎(Sallallaahou A'laihi Wasallam)‎ fine dire :

"Ene namaz dans mo masjid (masjid Nabawi) li meilleur ki mille namaz dans ene l’autre (masjid) apart masjid-ul-Haraam." (Sahih Boukhari)

C'est-à-dire ene namaz ki ene dimoune faire dans masjid Nabawi, li ena ene récompense ki dépasse mille namaz ki li faire ailleurs excepté masjid-ul-Haraam. Malgré tout ça sawaab et récompense énorme ki ene madame ti capave récolté dans faire namaz dans masjid Nabawi, Rassouloullah ‎(Sallallaahou A'laihi Wasallam)‎ fine préfère ki banne madames faire zotte namaz dans zotte la caze. Selon ene hadice, Rassouloullah ‎(Sallallaahou A'laihi Wasallam)‎ fine faire ene Sahabi nommé Hazrat Umme Humaid ‎(Radiyallahou anhou‎)‎ comprend ki so namaz dans so la caze li boucou pli bon ki li faire namaz dans masjid Nabawi.

(Sahih Bin Khuzaimah)

Faudré pas pensé ki Rassouloullah ‎(Sallallaahou A'laihi Wasallam)‎ fine prive banne madames de ene grand sawaab. Parceki ceki Rassouloullah ‎(Sallallaahou A'laihi Wasallam)‎ fine choisir pou banne madames li boucou pli bon pou banne madames. Si ene madame ena le plaisir habille d’après choix so missié, alors ki quantité la joie li bizin senti dans faire namaz dans ene l’endroit ki li d’après le choix de Rassouloullah ‎(Sallallaahou A'laihi Wasallam)‎ ?

Pli boucou sawaab

Ça signifié ene namaz ki ene madame faire dans so la caze, ça rapporte li pli boucou sawaab et récompense ki li faire li dans masjid Nabawi. Ene grand Mouhaddice (savant de hadice) nommé Mouhammad Bin Ishaaq Bin khuzaimah (223H - 311H) dire dans so Sahih Bin Khuzaimah :

"La déclaration de Nabi ‎(Sallallaahou A'laihi Wasallam)‎ ki ene namaz dans mo masjid (masjid Nabawi) li pli bon ki mille namaz dans ene l’autre masjid, par ça li fine signifié banne zommes, pas banne madames."

Ça explique l’attitude sévère et dur ki le célèbre Sahabi Hazrat Abdullah Bin Mas’oud ‎(Radiyallahou anhou‎)‎ ti pé adopté à l’égard banne madames ki ti pé vine masjid. Selon ene récit authentique rapporté dans Tabraani, Mouswannaf Abdurrazzaaq et Mouswannaf Ibn Abou Shaibah, Hazrat Abdullah Bin Mas’oud ‎(Radiyallahou anhou‎)‎ ti pé tire banne madames depi dans masjid et ti pé dire zotte :

"Sorti, alle zotte la caze. Ça li pli bon pou zotte."

Pli près avec bénédiction Allah Ta’ala

Rassouloullah ‎(Sallallaahou A'laihi Wasallam)‎ fine dire :

"Madame li ene aurah. Quand li sorti en dehors (so la caze), Shaitaan suive li. Pli près ki ene madame capave été avec bénédiction de so Rabb, c’est au moment ki li à l’intérieur de so la caze." (Sahih Bin Khuzaimah)

Aurah c’est ene kitchose ki ene dimoune gagne honté pou expose li. Ene kitchose pareille, ene dimoune ena tendance pou cachiette li. Donc selon ça hadice-là, Rassouloullah ‎(Sallallaahou A'laihi Wasallam)‎ fine qualifié madame de aurah ki signifié ki madame li ene kitchose ki bizin gagne honté pou expose li dans public. Li ene kitchose ki bizin cachiette tanque possible. Et ça li réalisé quand li reste dans so la caze et li pas sorte sorti pou narien. Et quand li reste dans so la caze sans ki li expose li dans public ou bien sans vine divant banne étrangers, c’est là ki li vine pli près avec bénédiction de so Rabb.

Pli bon namaz

Donc ça namaz ki li faire dans ene l’endroit ki li pli près avec bénédiction de so Rabb aussi pou ene pli bon namaz. C'est-à-dire ça namaz ki ene madame faire dans ene l’endroit pli retiré et pli cachiette dans so la caze, c’est ene pli bon namaz. Dans ene hadice Rassouloullah ‎(Sallallaahou A'laihi Wasallam)‎ fine dire :

"Namaz pli appréciable au près d’Allah Ta’ala ki ene madame faire, c’est ene namaz ki li faire dans place pli noir dans so la caze." (Sahih Bin Khuzaimah)

[Extrait de Al Jamiat Vol.4 No.12]