Valeur ibaadat dans jeunesse

La jeunesse c'est le printemps de la vie cote ene dimoune li ena tous so banne désirs, so banne ambitions so banne l'espoirs et so banne rêves. Et li ena aussi le courage et l'énergie ki permette li réalise so banne fantaisies et so banne rêves. C'est ene étape bien critique et cruciale cote ene personne li emporté par so banne désirs ki empêche li raisonné. Acoze ça li vine ene proie facile pou shaitaan.

Dans ça stage-là, si ene jeune fine vine dans chemin Allah Ta'ala et li fine fini so jeunesse dans so ibaadat, c'est vraiment ene grand sacrifice ki li fine faire. Sans doute ça sacrifice-là li mérite ene récompense impé spéciale et particulier parceki li fine donne ceki pli précieux de li même malgré toute sorte de tentations pou ene cause pli noble. D’après ene hadice ki trouve dans Sahih Boukhari et Sahih Mouslim, ena sept categories de personne ki pou gagne l’ombrage acote Allah Ta’ala jour Qiyaamah quand pas pou ena l’ombrage aukene part. Ene parmi là-dans c’est ene jeune ki fine passe so jeunesse dans ibaadat Allah Ta’ala.

Reste dans ibaadat Allah Ta'ala pendant jeunesse veut dire donne ceki pli bon de ou à celui ki pli bon ki tout.

En reconnaissance de ça grand sacrifice-là, Allah Ta'ala pou donne ça jeune-là l'ombrage en bas so Trône jour Qiyaamah.

A noté ki ça pas signifié ki li suffit passe ene parti so jeunesse dans ibaadat Allah Ta'ala mais ça bizin continué ziska la mort parceki d'après ene hadice, ça jeune-là li mérite ça faveur-là à condition ki li réussi garde li dans ibaadat Allah Ta'ala ziska la mort. Ça hadice-là pé montré ki ene ibaadat ki fine faire dans pleine jeunesse, li très valeureux et bien précieux ki bien appréciable au près d’Allah Ta’ala parceki ça li dimane boucou sacrifice. En principe si ene jeune fine habitué li dans ibaadat Allah Ta'ala pendant so jeunesse, alors li très normal ki li pou continué reste dans ibaadat Allah Ta'ala quand li vine dans l'age aussi.

[Extrait de Al Jamiat Vol.4 No.12]