Hidaayat

Hidaayat veut dire montré chemin ou bien guide kikene et indique li pou li capave arrive lors so destination. Ça genre de hidaayat-là ti assuré par banne Ambiya (Prophètes) ‎(Alaihis Salaam)‎‎. Et ça même genre de hidaayat ki dimoune capave disposé.

Apart ça ena encore deux types de hidaayat. Ça li dans la main Allah Ta'ala seulement. Personne pena pouvoir donne ça genre de hidaayat-là à kikene.

D'abord ene hidaayat ki Allah Ta'ala fine accorde tous so banne créatures indistinctement. Ça type de hidaayat-là li concerne banne kitchoses ki pena la vie aussi. C'est-à-dire banne zarbres, banne montagnes, banne roches, du feu etc. zotte tous fine gagne ça hidayaat-là. C'est à travers ça même hidaayat ki chaque atome de ça l'univers-là pé évolué d'après ki Allah Ta'ala fine programme zotte. Pena aukene créature ki capave alle en dehors ça programme-là. C'est acoze ça même nou pas trouve pied piment rapporte pomme d'amour et vis versa. Coumsa même Allah Ta'ala fine mette ene limite pou tout kitchose. Personne pas capave alle en dehors ça limite-là. Ça même kitchose ki Allah Ta'ala fine oulé dire dans Qour'aan-e-Kareem:

"… li fine donne à chaque créature so forme et après ça li fine guide li." (V50/ S20)

Apart ça ena ene l'autre forme de hidaayat ki trouve uniquement dans la main Allah Ta'ala. Ça même ki nou appelle tawfeeq. Ene dimoune li capave conne ene kitchose couma so cinq le doigt mais pou li mette li en pratique, ça c'est ene l'autre étape. Faudré gagne tawfeeq pou capave faire li. Sans tawfeeq personne pas capave faire ene bon action. C'est necque Allah Ta'ala ki donne le tawfeeq et la volonté pou pratique Deen par faire Imaan pénétré dans le cœur ene dimoune.

Chacha Rassouloullah ‎(Sallallaahou A'laihi Wasallam)‎ Abou Twalib fine bien faire pou Nabi ‎(Sallallaahou A'laihi Wasallam)‎. Li ti conne très bien cote la vérité été mais malheureusement li pas fine avoué ça Imaan-là. Pou ça même l'occasion ki Allah Ta'ala fine dire dans Qour'aan:

"Ou pas pou capave donne hidaayat celui ki ou content mais Allah ki guide celui ki li oulé…" (V56 / S28)

Ça verset-là pé montré ki ena ene genre de hidaayat (guidance) ki personne na pas capave dispose li apart Allah Ta’ala. Acoze ça si ene dimoune fine gagne l'occasion faire ene bon travail, li bizin reconnaissant envers Allah Ta'ala. Faudré pas li tappe l'estomac et li sous estime banne ki pas pé faire li. Li bizin toujours dimane Allah Ta'ala le tawfeeq et la volonté pou capave continué faire li. Parceki tanque ene dimoune li lors ça la terre-là, li couma dire li dans le course. Li capave tombé avant arrive lors butte. Acoze ça li bien recommandé ki ene dimoune li dimane pardon pou so banne manquements et li dimane Allah Ta'ala tawfeeq et stabilité lors Deen nuit et jour.

Dans ça contexte-là, ça doah-là pou bien bénéfique si nou faire li au moins après chaque namaz :

"O nou Rabb! Pas faire nou le cœur vine travers après ki To fine donne nou hidaayat et accorde nou ene bénédiction spécial de to coté." (V8 / S3)

Et en sus de ça, nou ena ene l’autre doah ki Nabi ‎(Sallallaahou A'laihi Wasallam)‎ ti ena l'habitude faire. Li bon nou faire li de temps en temps:

"يا مقلب القلوب ثبت قلوبنا على دينك"

"O celui ki vire-vire le cœur, garde nou le cœur stable lors to Deen."

[Extrait de Al Jamiat Vol.4 No.12]