L'assurance de Jannat

"Mo garanti jannat pou ene personne ki donne moi l'assurance concernant ça l'organe ki trouve entre so deux la mâchoire et ça l'organe ki trouve entre so deux li pied." (Sahih Boukhari)

Explication :

Ça l'organe ki trouve entre deux la mâchoire ki le hadice pé mentionné signifié la langue et ça l'organe ki trouve entre deux li pied signifié l'organe sexuel. C'est deux parties le corps ki dimoune mal servi en général acoze ki li difficile à contrôlé. Tout kitchose ki difficile à combatte, li représente ene jihaad. Et jihaad so récompense li ene récompense énorme et inestimable. Ça récompense-là li pas capave narien d'autre ki jannat. C'est dans ça façon-là ki celui ki combatte ça deux désirs-là, li mérite jannat en récompense ki Nabi ‎(Sallallaahou A'laihi Wasallam)‎ pé informe nou de ça dans ça hadice-là.

Surtout le désir sexuel, li ene désir ki dévasté ene dimoune si li mal servi li. Mal servi ça désir-là même ki appelle zina. Et tombe dans zina c'est "fana" (destruction). Acoze so gravité, pas seulement li interdit pou commette zina, li aussi interdit pou approche avec zina. Approche avec zina veut dire approche avec banne kitchose et banne éléments ki débouche vers zina. C'est dans ça sens-là ki Rassouloullah ‎(Sallallaahou A'laihi Wasallam)‎ fine qualifié de zina banne actions couma guetté, touché, cause banne paroles érotique et indécent avec ene étranger. Senti intentionnellement parfum ki ene étranger fine metté ou alle dans banne lieux cote capave faire ça banne travailles-là aussi li qualifié de zina.

Ene dimoune capave tombe dans ça bassesse-là soit acoze ki li ena l'excès de désir ou bien acoze ki li ena ene vice et vilain manière dans li ou bien acoze li trop exposé à banne éléments ki provoque ça désir-là dans li. Acoze ça shariat li préconise nikah et plis ki ça li mette ene l’emphase particulier pou pas guette banne personnes de sexe opposé et reste loin toujours de banne moyens ou banne lieux ki capave augmente le désir sexuel ou ranne li incontrôlable.

Apart ça trois-là, ena ene quatrième raison ki pli dure pou résisté. C'est quand proposition-là li vine de la part ene sexe opposé et ça aussi li pas de la part de ene n'importe ki sanla. Li vine de la part ene ki ena beauté et ki ena statu. Ça li tellement difficile pou résisté ki Hazrat Yusuf ‎(Alaihis Salaam)‎‎ ki pourtant li ene Nabi, fine bizin déclaré divant Allah Ta'ala:

"... والا تصرف عنى كيدهن أصب أليهن ..."

"… et si To pas protége moi de ça banne-là zotte pièges, (ena chance ki) mo capave alle attiré vers zotte …" (V 33/S 12)

Dans ça déclaration-là, cotte nou gagne l’occasion remarque humilité de Nabi Hazrat Yusuf ‎(Alaihis Salaam)‎‎ et so l’attachement avec Allah Ta’ala, là bas nou gagne l’occasion comprend impé le moment difficile ki ene dimoune traversé face à ene situation pareil. Et ça amène nou pou comprend ki personne pas à l’abri de péché et surtout de zina dans ene situation semblable si Allah Ta’ala pas enveloppe li avec ene rahmat (bénédiction) particulier de so part. Mais celui ki reste toujours attaché avec Allah Ta’ala so banne commandements et cherche Allah Ta’ala so aide pou garde li loin de banne péchés en évitant strictement banne moyens ki capave débouche vers ça bassesse-là, Allah Ta’ala sauve so l’honneur par sauve li de ça peché-là. Acoze ça non seulement bizin pas faire zina mais bizin pas approché aussi avec banne moyens ki pou debouche vers zina. Mais malgré ça, après tout banne précautions, si li fine tombe dans ene piege pareil sans attane et li fine résisté contre ça tentation-là ki souvent des fois faire dimoune vine fou zisse acoze la frayeur d'Allah Ta'ala, li ene pli grand moujahid. C'est acoze ça selon ene hadice ki trouve dans Sahih Boukhari Allah Ta'ala pou accorde ene personne pareil ene traitement très très privilégié et spécial par donne li place dans l'ombrage enbas so Trône jour Qiyaamah.

Bonne nouvelle pou banne ki baisse regard

Baisse regard représente ene visa de jannat parceki d'après ene hadice de Rassouloullah ‎(Sallallaahou A'laihi Wasallam)‎, difé l'enfer pas pou touche ça lizié ki fine protégé de banne kitchose ki pas gagne droit guetté. Coumsa même selon ene hadice Qudsi, Rassouloullah ‎(Sallallaahou A'laihi Wasallam)‎ fine dire ki Allah Ta'ala fine dire:

"النظرة سهم مسموم من سهام ابليس من تركها من مخافتى ابدلته ايمانا يجد حلاوته فى قلبه"

"Mauvais regard (vers sexe opposé) li ene flèche parmi banne flèches ki Ibliss ena. Celui ki abstenir de ça acoze ki li ena Mo la frayeur, en retour Mo pou donne li ene qualité Iman ki li pou senti so douceur dans fond so le cœur." (At-Tabraani/ Al-Moustadrak)

D'après ça hadice-là, ene dimoune li bénéficié ene genre de Iman et de conviction ki li capave senti li au fond de li même par baisse so regard et par résisté contre tentation. Banne 'Oulama fine considère baisse regard comme ene garanti et ene l'assurance pou rente dans jannat à la lumière de ça hadice-là. Parceki normalement d'après hadice quand Allah Ta'ala donne kikene la douceur de Iman dans so le cœur, li pas reprend li. Ça veut dire quand ene dimoune gagne la douceur de Iman acoze ki li baisse so regard et li résisté conte so désir, ça Iman-là continué reste avec li ziska ki li mort. Ene Imaan ki reste avec ene dimoune ziska so dernier l'heure c'est ene garanti ki la personne concernée pé alle dans jannat. Donc banne 'Oulama fine base zotte lors ça même point pou dire ki baisse regard et résisté contre so désir charnel, li ene moyen pou faire ene dimoune mort lors Iman. Et mort lors Iman li ene condition pou rente dans jannat. Donc baisse regard li garanti ene dimoune jannat.

[Extrait de Al Jamiat Vol.4 No.13]