Vive bien

Vive bien et laisse dimoune vive en paix. C’est le message de l’Islam. Pou réalise ça objectif-là, l’Islam li préconise certaines règlements et disciplines ki chaque individu bizin adopté. Suive ça banne règlements-là même ki appelle taqwa.

Bon ou mauvais, tout kitchose ki nou faire li bizin ena ene but. C’est dimoune ki pena l’esprit ou dimoune ki dessane dans ene niveau ki pena l’esprit ki faire kitchose sans ki ena ene but derrière ça. Taqwa so but principal c’est le plaisir d’Allah Ta’ala. Ene dimoune bizin toujours suive banne principes-là zisse pou faire Allah Ta’ala plaisir. En retour, Allah Ta’ala accorde li ene la vie douce dans dounia et le bien être total dans aakhirat. Donc sans ki dimoune reconnaite so Créateur et suive so banne règlements et so banne commandements ki li fine imposé lors zotte, pas capave ena la paix dans dounia. L’opprimé pou passe misère lors ça dounia-là et si li bon en li même, li pou ena so bien être dans aakhirat. Et l’oppresseur aussi pas pou capave vive en paix. Li pou vive toujours lors tension et bouleversement. Apart ça li pou ena pou subir pou ceki li fine faire dans dounia après so la mort. Finalement pas pou ena quelque chose ki appelle la paix ou tranquillité dans dounia. Ça permette nou dire ki pena tranquillité ni la paix sans suive commandements Allah Ta’ala.

"… c’est necque dans zikrullah ki le cœur gagne tranquillité" (S13/V28)

Si ou envi vive bien, ou bizin apprane laisse dimoune vive bien. Dans laisse dimoune vive bien, ou pas pou perdi narien. Au contraire ou aussi ou pou gagne ou la paix.

Mais faudré pas pensé ki ene dimoune  pena droit réagir. Li tout à fait normal ki ene dimoune pou agir si li senti li même ou bien so famille ou bien so dibien ou bien so l’honneur menacé. Allah Ta’ala so Deen donne chaque dimoune ça droit-là. Et même banne "man-made laws" aussi pena narien à dire conte ça. D’après la loi Allah Ta’ala, ene dimoune li vine shaheed si li fine perdi so la vie dans sauve so la vie ou bien so famille ou bien dans sauve so du bien ou bien so l’honneur.

Li bon conné ki Deen Islam condamne l’injustice dans tous so banne formes. A tel point ki shariah li bien sévère envers banne ki maltraite banne zanimau aussi. Si ou pas content ene zanimau, ça pas permette ou martyrise li ou bien faire li passe misère.

La vie li ene kitchose sacré ki bizin donne li so respect. Tout ceki pou montré respect pou la vie, pou être respecté et protégé en retour. Et li tout à fait normal ki li bizin subir en fonction de so négligence envers la vie lezot. Coumsa même ene dimoune so dibien aussi li sacré. Pas gagne droit interfère avec du bien kikene par rasse ça avec li, par embette li, par trick li ou bien par coquin li.

Parfois shaitaan embette ou et piège ou dans ene qualité piège ki ou trouve li bien bon et bien intéressant. Par exemple li mette dans ou la tête pou coquin banne ki ena et partage li à banne ki pena. Ça li bon zisse pou faire cinéma avec ça. Li pena aukene fondement dans shariat. Banne Sahaba-e-Kiraam ti pé alle travail comme porteur dans bazar pou capave faire sadaqah et la charité avec ça. Celui ki ena boucou pitié pou banne pauvres, li bizin montré ça avec so la sueur. Faudré pas li montré li généreux avec la monnaie ki pas pou li. Bref sa manière coquin banne riche pou aide banne pauvre, li pena narien à faire avec l’Islam quand même li paraite ene joli l’idée. C’est purement l’injustice et dominere ki empêche dimoune vive bien.

[Extrait de Al Jamiat Vol.4 No.13]