Collé avec la crache

Zordi jour ou trouve dimoune ene général ki zotte l’amitié li couma dire ene kitchose ki collé avec la crache. C'est-à-dire li ene l’amitié ki pas duré longtemps. Zotte capave mort pou ene kitchose ki bien simple et ki capave paraite bien banale. Couma zotte capave vine ou l’ennemi pou narien ditout ou bien zisse acoze ou bon cozé pas fine satisfaire zotte tendance malsaine et perverse.

Bref zotte pas stable dans zotte l’amitié. Zotte change couleur à la minute. C’est ene l’attitude enfantin ki pas digne à banne ki vraiment intelligent. Quant à ene dimoune sage et ki Allah Ta’ala fine éclair so le cœur avec Noor-e-Iman, li toujours conne évalué dimension de chaque kitchose et li traite chaque kitchose d’après so mérite. Li capave pas d’accord avec kikene mais pas pou autant li dire kitchose ki pas existé lors so ‘adversaire’.  So sagesse, so connaissance et so Deen empêche li dérapé. Si par principe li pas tolère banne bavure de so adversaire, li pas refuse accepté banne bon coté et banne vertus de so adversaire aussi. Li pas laisse li aveuglé par so l’intérêt personnel ki faire li ferme lizié avec banne mérites ki so camarade capave ena. Dans ça même contexte-là ki nou ena ene causé ki dire :

"Vaut mieux ene adversaire intelligent ki ene camarade imbécile"

D’après hadice de Nabi ‎(Sallallaahou A'laihi Wasallam)‎, blié tous banne bienfaits ki ene camarade ena zisse acoze ene ti reproche, c’est caractère ene madame. Donc pou nou capave faire ene bon jugement à propos kikene et nou ena ene bon l’amitié ki basé lors ene fondation solide, nou bizin réglé et équilibré nou même à travers reste dans compagnie banne personnages pieux. Parceki Noor-e-Imaan li développé par reste longuement avec banne ki ena ene imaan ferme et solide. Sinon nou pas pou capave faire la justice avec nou même. Nou pas pou capave être juste envers lezot. Donc nou capave détesté celui ki nou ti content hier couma nou capave près pou donne nou la vie demain pou ene ki nou pé détesté li zordi. Et tout ça-là dans ene façon ki pas capave justifié. Donc l’amitié-là li pas pou plis ki ene l’amitié ki fine collé avec la crache ki pas prend boucou pou décollé. 

[Extrait de Al Jamiat Vol.4 No.13]