Difficulté et problèmes

Dimoune pas capave reste sans problème lors ça la terre-là. Chaque dimoune bizin ena kit problème. Mais chakene so problème li dans so façon. Ena ki so problème li bien grave et ena ki so problème li pas sa grave-là. Mais chaque dimoune li considère so problème pou ene grand problème. C’est parceki ene ti problème capave vine ene grand problème si fine laisse li coumsa même sans remédié li.

Mais quand ou ena imaan, faudré pas ou découragé. Ou bizin ena ene solution pou ou problème. Et ou bizin garde l’esprit haute et faudré pas jette zarme parceki ou ena ene la porte dans sire pou tappé. C’est la porte Allah Ta’ala. La porte Allah Ta’ala li pou tout dimoune. Li pas seulement pou banne ki dans Deen. Li ene la porte pou banne ki pas dans Deen aussi. Necque ena pou dimane pardon pou banne erreurs ki ou fine faire et prend ene décision ferme pou pas refaire li et dimane Allah Ta’ala ceki ou bizin. Sans doute Allah Ta’ala pou aide ou et pou tire ou depi dans difficulté ki ou été. Et ça la porte de grace-là li ouvert pou même banne ki fine passe ene bon boute de zotte la vie dans kufr et shirk aussi. Necque ena pou repentir et faire tawbah de shirk et kufr et attrape la corde de l’Islam. Dans ene clin d’œil tout pou fini pardonné et ou pou vine couma dire jamais ou ti faire ça. Mais bizin repentir et faire tawbah avec sincérité.

Difficulté ou problème ki ene dimoune gagné dans ça dounia-là, li capave le résultat de ene de banne mauvais ki li fine faire. Donc la solution li trouve dans dimane pardon avec Allah Ta’ala. Selon ene hadice, ene dimoune ki faire istighfaar et dimane pardon avec Allah Ta’ala régulièrement, Allah Ta’ala tire li depi dans difficulté ki li été, soulage li dans souffrance et accorde li so nécessité dans ene façon ki li pas attane.

Donc si ene dimoune oulé reste en paix et dans bien, alors li bizin pas désobéir Allah Ta’ala. Si jamais li arrivé faire li, alors li bizin pas tardé pou dimane Allah Ta’ala pardon.

[Extrait de Al Jamiat Vol.4 No.15]