Couma vine ene bon musulman

Masjid c’est ene place ki fine faire pou faire Allah Ta’ala so ibaadat en forme namaz, tilaawat-ul-Qour’aan, zikrullah etc. Mais ene dimoune li bizin reste dans l’obéissance Allah Ta’ala partout à cote li été. Pas zisse dans masjid. Li bizin reste dans l’obéissance Allah Ta’ala tout le temps. Pas zisse dans le mois de ramadhan. Parceki Allah Ta’ala li nou Rabb partout et pou tout le temps.

Couma li bizin comporte li comme ene bon croyant dans masjid, coumsa même li bizin comporte li en dehors masjid, dans bazaar et lors la plage parceki li ene croyant acote li été. Couma li comporte li couma ene bon musulman divant dimoune, coumsa même li bizin comporte li dans ene l’endroit cote personne pas pé guette li ou bien cote personne pas conne li.

Ene personne ki comporte li partout comme ene bon musulman, c’est ene personne ki ena ça qualité ki Nabi ‎(Sallallaahou A'laihi Wasallam)‎ fine appelle sa Ihsaan. Ihsaan c’est ene l’état d’esprit ki faire ene dimoune senti présence Allah Ta’ala. Dans ene l’état pareil ene dimoune pou hésité faire kitchose ki Allah Ta’ala pas content couma li pou hésité pou néglige so devoir envers so Rabb.

Donc pou vine ene bon musulman, ene personne li bizin développe ça qualité de Ihsaan. Mais ça pas capave inculqué par guette dans livre seulement. Bizin assize ene bon boute le temps avec banne ki ena ça dans zotte. Sans ça, pratiquement li bien difficile.

Ça donne nou ene l’idée ki quantité li important pou apprane Deen avec banne Deendaar par reste dans zotte compagnie. C’est ça même façon naturelle pou apprane Deen et pou vine Deendaar. Apprane Deen à travers livre sans reste en compagnie banne Deendaar, li couma dire boire dilait dans biberon. Définitivement ene zenfant pareil pas capave vine couma ça zenfant ki pé boire avec so mama.

[Extrait de Al Jamiat Vol.4 No.15]