Ene campagne très louable

Faire campagne pou banne madame faire zotte namaz dans ene l’endroit pli cachiette dans zotte la caze, c’est ene façon pou encourage ceki Nabi ‎(Sallallaahou A'laihi Wasallam)‎ fine qualifié de meilleur. Donc c’est ene zeffort louable. Mais si malgré ça, banne madame zotte alle masjid pou faire namaz, zotte pé tourne le dos avec ceki Nabi ‎(Sallallaahou A'laihi Wasallam)‎ fine appelle li meilleur. Li pas ene kitchose ki bizin être fière de ça mais li "high time" pou trappe la tête et ploré lors la pauvreté de nou Imaan ki faire nou tappe l’estomac lors ene pratique ki contraire à ceki Nabi ‎(Sallallaahou A'laihi Wasallam)‎ fine qualifié de meilleur. Faudré pas nou trop content quand nou réussi rempli masjid avec banne madame parceki nou pé faire ene zeffort ki li contraire de ceki Nabi ‎(Sallallaahou A'laihi Wasallam)‎ ti content. Ene bon musulman pas capave ena ene l’attitude pareil. Ki Allah Ta’ala protège de ça !

Nou bizin comprend ki le vrai succès trouve dans suive Nabi ‎(Sallallaahou A'laihi Wasallam)‎. Par suive Nabi ‎(Sallallaahou A'laihi Wasallam)‎ même ki nou capave montré nou l’amitié pou Allah Ta’ala. Si Nabi ‎(Sallallaahou A'laihi Wasallam)‎ fine préfère la caze pou nou banne mama et nou banne sœurs, faudré pas nou faire le contraire de ça par écoute tout dimoune et surtout banne dimoune ki pas fine gagne l’occasion apprane Deen par assize en compagnie banne personnages pieux et banne professeur qualifiés. Sinon jamais nou pou ena réussite parceki ça li trouve uniquement dans suive Nabi ‎(Sallallaahou A'laihi Wasallam)‎ et dans faire ceki li fine content pou nou.

[Extrait de Al Jamiat Vol.4 No.15]