Ki ou pou repone ?

Jour Qiyaamat si Nabi ‎(Sallallaahou A'laihi Wasallam)‎ dimane ou ki faire ou pas fine laisse ou visage ressemblé mo visage, lerla ki ou pou repone ? Si li dimane ou ki de vilain ou ti trouvé dans moi pou ou pas fine faire couma moi et ki joli ou ti trouve avec lezot ki ou fine garde ou cheveu et rase ou la barbe couma banne-là, alors ki réponse ou pou ena ? Pas faire la tête dure et pas tire prétexte. Ou en tort et définitivement ou en tort. Nou reconnaite ki ena ene catégorie parmi nou ki malgré zotte bonne volonté, pas pé capave faire li, c’est Allah Ta’ala tout seul ki conne zotte l’empêchement et zotte difficulté. Mais la plupart parmi nou pé néglige ça sounnat-là par négligence et par manque de volonté. Astere si ou pena même volonté, faudré pas ou jette zarme aussi. Continué dimane Allah Ta’ala pou accorde ou la volonté. Si ou sincère dans ou douah, Allah Ta’ala pou faire li vine facile pou ou ene jour.

Faudré pas blié ki si l’ampoule de nou Imaan li pas connecté avec Noor-e-Mouhammadi, jamais li pou éclairé et  tout le temps nou pou reste dans noireté. Donc nou bizin faire nou maximum zeffort pou connecté nou avec tareeqah et mubaarak principe de nou bien-aimé Nabi ‎(Sallallaahou A'laihi Wasallam)‎.

[Extrait de Al Jamiat Vol.5 No.1]