Pantalon la haut cheville

Mette pantalon ou pyjama ou izaar ou bien loungi la haut cheville c’est tenue ene musulman. D’après hadice, couvert cheville li ene signe de l’orgueil ki li haraam. Rassouloullah ‎(Sallallaahou A'laihi Wasallam)‎ fine mette en garde contre ça banne tenue-là et fine averti nou ki ene dimoune pareil pou mérite ene traitement bien défavorable dans aakhirat. Couvert cheville avec pantalon li grave, même si faire li sans aukene l’esprit de l’orgueil. Et si faire li par l’orgueil, li vine pli grave. Parceki mette pantalon ki couvert cheville li ene signe de l’orgueil. Couma nou pas gagne droit ena l’orgueil, coumsa même nou pas gagne droit imite ene tenue de banne ki ena l’orgueil. C’est acoze ça li grave même si mette li sans aukene l’idée de l’orgueil. Couma pas gagne droit mette ene pantalon ki couvert cheville, coumsa même pas gagne droit mette ene kurta ou ene joubbah ki couvert cheville. A noté ki ça li applique zisse pou banne zommes. Li pas applique pou banne madames. Mais faudré pas mette ene robe ki balié la rue aussi.

Découvert cheville c’est la mode Nabi ‎(Sallallaahou A'laihi Wasallam)‎. Ki nou pé attane pou faire li ? Eski nou pé attane kit acteur faire li pou nou trouve li joli ? Ene bon musulman li trouve joli tout ceki nou bien aimé Nabi ‎(Sallallaahou A'laihi Wasallam)‎ fine faire. Dimoune capave dire ceki li envi mais pena pli joli ki ceki Nabi ‎(Sallallaahou A'laihi Wasallam)‎ fine faire et fine recommane nou pou faire ça. Mais bizin ena ça lizié ki pou trouve ça-là !

[Extrait de Al Jamiat Vol.5 No.1]