Drôle mentalité

Concernant Deen, dimoune li là pou tire tout qualité prétexte pou pas faire ene kitchose ki conte so goût. Si so prétexte pas fine marché même, à ce moment-là li faire li mais li faire li pli tigite ki li capave zisse pou couvert frais. Et concernant dounia, li rode pli bon kitchose. Li pas satisfait avec le minimum. Si fallait li plonge dans l’impureté l’intérêt ziska la gorge pou li capave gagne ene pli zoli l’auto ou bien ene pli zoli la caze. Mais li pas calcule ça gravité ki li pé commette-là. Couma dire li pena pou mort et li pena aukene compte à rendé. Li bien grave quand ene dimoune arrive dans ene l’étape pareil. Ene musulman pas capave pense dans ça façon-là ni li capave vive dans ene l’insouciance et négligence pareil. C’est banne ki pas croire dans Allah Ta’ala et dans aakhirat ki vive coumsa. Malheureusement musulman pas satisfait avec ceki li ena. Li trouve ceki pou lezot pli bon. A tel point li conne pou lezot pli bien ki ceki pou li. Et ça fine amène li pou vive so la vie couma lezot pé vive sans pense Allah Ta’ala et sans pense aakhirat.

Quand ou cause lors so tenue et so l’habillement, li capave dire ou ki Allah Ta’ala pas guette tout ça-là. Pourvu le cœur ki bizin clair. Nou d’accord ki c’est ene vérité ki pena sortir de la parceki si ou pena Imaan dans ou le cœur, ou l’habillement ou bien ou tenue pas pou ranne ou aukene service. Mais li malheureux pou constaté ki boucou parmi nou zotte servi ça argument-là comme ene paravent. Si li vrai ki ena banne ki pé cachiette derrière zotte l’habillement, ça aussi li pas moins vrai ki boucou pé cachiette pé faire toute sorte bêtise derrière ça argument-là.

Eski li pas ene drôle mentalité ki quand ena pou pratiqué, ou dire le cœur ki bizin clair mais quand ena pou marié ou blié tout. Ou ramasse ceki ou gagné, pourvu la peau ki bizin clair !

Nou bizin arrêté avec ça mentalité-là concernant Deen. Nou bizin vise ceki pli bon. Et concernant dounia aussi nou capave rode ceki pli bon mais à condition ki ça pas mette nou dans haraam et pas faire nou néglige Deen.

[Extrait de Al Jamiat Vol.5 No.2]