Conne valeur ou la vie

Conne garde valeur ça la vie ki Allah Ta’ala fine donne ou. Ene dimoune ki conne valeur ene kitchose, li pou conne servi ça kitchose-là d’après ça kitchose-là so valeur. Jamais ou pou trouve kikene mette ene joli linge pou faire nettoyage dans so jardin ou bien dans so la caze. Eski ou fine déjà trouve ene mécanicien mette ene joli linge couleur blanc couma dilait et pé répare ene moteur plein ek disuif ?

Si ou fine trouve kikene coumsa, li capave ene kikene ki peut être fine sauvé de quelque part dans Beau Bassin. Mais ene kikene ki vraiment di sang pé bien pompé dans so cerveau, li pas pou faire ene bouffonnerie pareil.

Tout ça-là arrivé quand ene dimoune pas conne valeur ene kitchose.

Ça la vie ki Allah Ta’ala fine accorde nou, li ene kitchose bien précieux et bien valeureux. C’est ene moyen et ene l’occasion ki Allah Ta’ala fine donne nou pou prépare nou aakhirat c'est-à-dire nou la vie après la mort. Ça la vie dans ça le monde-là nou gagne li ene seul fois. Pas pou regagne li encore. Normalement quand nou conné ki nou pas pou regagne ene kitchose, alors dimoune ena tendance tire maximum profit avec ça kitchose-là. Donc nou bizin tire maximum profit avec ça la vie ki Allah Ta’ala fine donne nou.

Astere bizin guetté dans ki façon nou pou tire maximum profit avec ça la vie-là. Si nou jouir ça la vie-là d’après nou désir et nou passion, nou pas pou bénéficié narien après la mort. Au contraire nou pou mette nou aakhirat en gage. Punition-là pou commencé depi dans Qabar même. Mais si nou fine ena ene tigite volonté et nou fine amène nou la vie d’après le plaisir Allah Ta’ala, alors nou pou dans bien ici dans dounia et dans aakhirat.

Ene dimoune ki gaspille so la vie derrière so passion et so désir et dans diverti, li couma ça dimoune ki pé nettoye la rue avec ene linge couleur blanc ou bien ça dimoune ki pé transporte ene panier malpropreté dans so joli mercedes. C’est ene dimoune ki vraiment ignorant et ki pas conne valeur ene kitchose ki bien valeureux parceki Nabi ‎(Radiyallahou anhou‎)‎ fine dire ki ene dimoune vraiment intelligent c’est ene dimoune ki garde li même sous control et ki faire travail ki bénéfique et profitable pou après la mort.

[Extrait de Al Jamiat Vol.5 No.2]