Vive pou Allah Ta’ala

 Ena tout qualité mentalité. Donc ena tout qualité vive lors ça la terre-là. Chaque dimoune ena ene idéal et ene but. Et li vive pou ça même.

Ene kaafir li vive pou ça dounia-là même parceki li croire dans ça même la vie. Parmi ena là-dans ki pé vive dans mette so la bouche dans tout récipient. Li galoupe par ici par la bas zisse pou mangé boire et diverti. Ena ki pé vive zisse pou so vice couma la drogue, casino etc.

Ena ene l’autre catégorie ki bien apart. C’est ene catégorie ki vive lors ça la terre-là mais ki croire dans ene l’autre la vie après ça la vie lors ça la terre-là. C’est ene banne ki pé vive lors ça la terre-là pou bâtir ça l’autre la vie ki pé attane zotte après ça la vie-là. Ça l’autre le monde-là même ki appelle aakhirat. Vive lors ça la terre-là pou bâtir ça l’autre la vie-là appelle vive pou aakhirat. Et vive pou aakhirat c’est vive pou Allah Ta’ala.

Tous banne kitchose pou lequel nou pé vive lors ça la terre-là, narien na pas pou bénéfique pou nou pou tout le temps. C’est ene seul façon de vive ki pou bénéfique partout et pou tout le temps. Et ça c’est ene la vie ki ene dimoune fine vive pou Allah Ta’ala. Vive pou Allah Ta’ala c’est ene la vie extra ordinaire. C’est ene façon de vive ki garanti le salut éternel. Alors ki fer gaspille ou la vie aussi précieux derrière banne kitchose ki soit ou pou bizin quitté allé ou bien ça kitchose-là pou quitte ou. Ki fer bizin mort derrière banne kitchose ki pou pourri en bas la terre ? Allah Ta’ala pou reste pou tout le temps. C’est li même ki ena capacité aide nou et donne nou ceki nou bizin partout et pou tout le temps. Pena la pluie, pena soleil pena cyclone ni mauvais temps ki capave empêche li aide nou. Li la pou aide nou partout, tout le temps et dans tout circonstance.

Vive pou Allah Ta’ala c’est l’avenir, c’est prospérité et c’est ça même ki garanti le bien être éternel :

"O Allah ! Aide nou pou vive zisse pou toi."

A noté ki vive zisse pou Allah Ta’ala pas signifié à aukene moment ki bizin néglige tout travail mondaine. Allah Ta’ala jamais fine empêche travail. Nabi ‎(Sallallaahou A'laihi Wasallam)‎ fine toujours encourage dimoune pou travail afin ki li capave gagne so vive sans ki li vine ene fardeau pou lezot. Banne Sahaba-e-Kiraam, banne tabeines et banne taba-tabeines fine toujours exerce zotte métier pou gagne zotte vive. Mais zotte ti toujours inspiré et guidé par commandement Allah Ta’ala et le moubarak sounnat de Nabi ‎(Sallallaahou A'laihi Wasallam)‎ dans tout ceki zotte ti pé faire. Jamais zotte fine laisse zotte emporté ou influencé par dounia. Donc vive zisse pou Allah Ta’ala signifié applique commandements Allah Ta’ala d’après le moubarak sounnat et principe de Nabi ‎(Sallallaahou A'laihi Wasallam)‎ dans tous banne domaine de la vie.

[Extrait de Al Jamiat Vol.5 No.2]