L’habillement madame

Ene madame bizin pas sorte-sorti depi dans so la caze. Li bizin considère so la caze comme ene forteresse ki protége so la chasteté et so l’honneur.
Et quand li ena pou sorti pou kit nécessité, alors li bizin couvert li bien. Couvert bien veut dire ki li couvert li depi enbas ziska la haut y compris so visage aussi. Li bizin mette ene linge ki so forme le corps pas paraite. Et li bizin ene linge ki pas attirant.
Habille dans ça façon-là li bien facile. Li pas difficile ditout. Nou l’esprit ki dire nou ki ça li bien difficile zordi jour. Et nou pou gagné aussi banne dimoune ki pou décourage nou adopté ene tenue pareil. Mais banne ki ena imaan lors Allah Ta’ala et banne ki croire dans ene jour cote zotte ena pou ranne compte cote Allah Ta’ala, zotte pas pou hésité faire li. Après tout ki fer ene dimoune pas bizin habillé dans ene façon ki li paraite joli dans lizié Allah Ta’ala. Et ki fer li bizin habille dans ene façon ki dimoune apprécié mais ki dégouttant et détestable dans lizié Allah Ta’ala.
Ena banne façon habillé ki peut être longtemps nou pas ti content li mais ça même kitchose nou apprécié li zordi et nou pé galoupe derrière ça pou la simple raison ki ça fine vine en vogue zordi jour. Si acoze tendance dimoune nou capave commence content ene la mode zordi ki nou pas ti content li hier, alors ki fer nou pas capave adopté ene façon habillé ki Allah Ta’ala content ? Ena grand récompense cote Allah Ta’ala pou banne ki sacrifié zotte désir pou faire Allah Ta’ala plaisir. Ene madame ki intéresse pou habillé d’après shariat, li capave faire li tigite par tigite et doucement doucement ziska ki li arrive cote bizin arrivé. D’abord li essaye diminué so sorti et évite alle dans banne fiançailles, mariages et banne cérémonies mixte. Li mette ene linge ki pas collé lors so le corps et li commence prend l’habitude mette ene horni. Insha Allah doucement doucement ça pou faire li arrive ziska pardah complète. Mais à condition li ena la volonté et li continué dimane doah ki Allah Ta’ala donne li le courage. Quand ene dimoune intéresse pou faire ene kitchose, alors kitchose difficile aussi vine facile.
Banne zommes ki pé commette banne immoralité dans la société, zotte bien en tort et zotte pena aukene excuse pou ceki zotte pé faire mais comme dit cozé "deux la main batté". Alors nou banne sœurs ki pé mal habillé, zotte aussi zotte ena zotte part et zotte aussi zotte bien responsable. Si banne zomme zotte baisse zotte regard et banne madame zotte couvert zotte bien, alors Insha Allah pas pou arrive ceki tous les jours nou pé tendé et nou pé lire dans la gazette. Faudré pas laisse difé ek l’essence ensemble.
Soit disant banne grand grand coco mais zotte pas arrivé comprend ça ene tigite-là aussi. Mais grand coco pas dire narien. Bizin ena le courage et la fiele pou applique la vérité.

[Extrait de Al Jamiat Vol.5 No.2]